Por medio da presente entrada queremos facer un primeiro anuncio preliminar de dous actos públicos que terán lugar proximamente en Cariño, en ambos casos organizados ou co-organizados pola nosa Agrupación.
O vindeiro sábado, 23 de novembro, celebraremos unha charla-coloquio que leva por título Educando en desigualdade: os recurtes no ensino público na comarca do Ortegal. A charla será impartida polo noso compañeiro Antonio Álvarez Cisneros, mestre no ensino público, Secretario de Educación da Executiva Provincial do PSdeG-PSOE e membro de FETE-UGT. O acto será introducido pola Secretaria Xeral da Agrupación Socialista de Cariño, Ana Fachal, mentres que José Miguel Alonso Pumar encargarase de presentar ó ponente, de quen é compañeiro na Executiva Provincial. Trala intervención de Álvarez Cisneros, terá lugar un turno de intervencións aberto ó público.
Un par de semanas despois, na tarde do sábado 7 de decembro, terá lugar a presentación do libro Traballo, oficios e crenzas populares dos nosos antergos, do que é autor Narciso Luaces. Como seguramente lembrarás, este acto estaba previsto para o 19 de outubro, pero tivo que ser cancelado por circunstancias persoais do autor. Finalmente terá lugar o sábado 7 de decembro. A nosa Agrupación co-organiza esta presentación, en colaboración coa Asociación O Faroleiro e o Concello de Cariño.
Nos vindeiros días iremos dando a coñecer os detalles destes dous eventos.