O pasado sábado 23 de novembro, como xa adiantáramos nesta web, celebramos unha xornada de traballo en Cariño coa participación de varios compañeiros da comarca e do Secretario Provincial de Educación do PSdeG, Antonio Álvarez Cisneros.
A tarde comezou cunha reunión de traballo interna, no local da Agrupación Socialista de Cariño. Posteriormente, trasladámonos ó Local Social do Concello, onde o noso compañeiro Álvarez Cisneros impartíu a charla Educando en desigualdade: os recurtes no ensino público na comarca do Ortegal. Esta charla intégrase no ciclo Educando en desigualdade, que, promovido pola Secretaría Provincial de Educación, está a explicar en distintos concellos da provincia os retos e ameazas que afronta actualmente o noso sistema educativo.
A charla-coloquio foi presentada por Ana Fachal, Secretaria Xeral da Agrupación Socialista de Cariño, quen lembrou o histórico compromiso d@s socialistas co sector público e en particular coa sanidade, a educación e o sistema de pensións. De seguido o noso compañeiro José Miguel Alonso presentou ó conferenciante, de quen é compañeiro na Executiva Provincial.
Antonio Álvarez Cisneros resumíu os resultados do seu estudo –xa comentado na nesta páxina- sobre os recurtes no ensino na nosa provincia, que sitúan á comarca do Ortegal como a máis perxudicada, cun recurte que practicamente duplica a media provincial no período 2009-2013. É importante subliñar que esta redución refírese exclusivamente a gastos de funcionamento (para material, fotocopias, calefacción, actividade extraescolar, etc.) e non inclúe recurtes na plantilla de profesorado e outro persoal, que obviamente agravarían as cifras expostas. No público atopábanse varios profesionais do ensino que no coloquio posterior introduxeron interesantes reflexións, como por exemplo o feito de que as asignacións presupostarias non teñen en conta parámetros e pecularidades como a localización xeográfica dos centros, que obviamente poden perxudicar aínda máis a lugares periféricos como esta comarca. Por exemplo, unha visita á Casa das Ciencias non lle custa o mesmo a un colexio do Ortegal que a un situado na cidade herculina.
Houbo tempo tamén para analizar brevemente o panorama que se aveciña coa Lei Orgánica para a Mellora da Calidade Educativa (LOMCE) que pretende sacar adiante o polémico Ministro Wert. Criticáronse aspectos como a validez curricular da asignatura de relixión ou a recuperación das probas externas de avaliación ou reválidas, que xunto a outros discutidos cambios pretenden implementarse nun contexto de forte redución do gasto público. Tanto o ponente como outros profesionais do ensino presentes na charla-coloquio sostiveron que a LOMCE supón un retroceso incluso fronte á Lei Xeral de Educación de 1970 impulsada polo ministro José Luis Villar Palasí, que definiron como máis avanzada e inclusiva.
A xornada de traballo resultou unha experiencia positiva, na medida que respostou a varios dos obxectivos que debemos marcarnos como Agrupación: achegar información á cidadanía, analizar a realidade e tentar transformala nunha dirección máis xusta e democrática.