Transcorridas xa un par de semanas dende a celebración das eleccións municipais do 22-M, esta páxina recupera o seu formato habitual. En concreto, vimos de suprimir o menú Municipais 2011, que estaba situado na parte dereita da páxina, así como o contido das cinco seccións que o conformaban (Candidato, Candidatura, Programa, Boletín e Axenda). Porén, o número 10 do Boletín de Información Municipal, que publicamos durante a campaña, estará novamente dispoñible en poucos días, na sección Descargas. Seguindo a práctica habitual, as entradas que colgamos na páxina principal seguen accesibles a través do menú situado na parte inferior da páxina. E, por suposto, mantemos operativo o perfil Psoe Cariño en Facebook.
Como podes ver na gráfica adxunta a esta entrada, a nosa páxina experimentou un forte ascenso no número de visitas durante a precampaña e campaña electoral, cunha media diaria de 116 visitas únicas no mes de abril e 108 no mes de maio. Os totais mensuais do mes de maio foron especialmente significativos, con 20.557 páxinas vistas, 67.057 arquivos e 89.874 accesos.
Mantivemos un forte ritmo de actualización dende os meses previos ós comicios municipais, así como actualizacións diarias durante a campaña. Fomos, de feito, a forza política cariñesa con maior presenza en internet. Como tamén terás comprobado, a partir do 22 de maio levantamos o pe do acelerador e reduxemos a nosa actividade na páxina. Despois dunha intensa campaña, e coñecidos os resultados das eleccións, precisamos tomarnos un pequeno respiro, organizar a nova etapa que se abre para o socialismo cariñés, agardar a que a nova lexislatura comece a xerar contidos para esta páxina web… Ás veces esta web vai máis despacio, pero nunca está parada. A nova lexislatura comeza oficialmente este sábado. E o noso compromiso contigo, e con toda a cidadanía, mantense plenamente vixente.