PSOE Cariño

O Partido Socialista alerta da situación “inadmisible” que sofre a veciñanza de Cariño pola falta de cobertura médica no Centro de Saúde, que obriga ás persoas usuarias a esperar ata 13 días para unha cita de atención primaria.

Co obxectivo de esixir unha resposta inmediata, o Partido Socialista presentou unha moción no Pleno do Concello de Cariño para instar á Xunta a adoptar unha solución estable e urxente que asegure a cobertura permanente das prazas de medicina de familia e pediatría, e que podes ler a continuación:

O Grupo Municipal Socialista no Concello de Cariño de acordo ao disposto no artigo 71.3 do Regulamento de Organización, Funcionamento e Réxime Xurídico das Entidades Locais desexa elevar ao pleno  Municipal a seguinte MOCIÓN.

EXPOSICIÓN DE MOTIVOS

A sanidade pública é un dos piares fundamentais do Estado do Benestar e un dereito recoñecido no artigo 43 da Constitución Española. Garantir unha atención sanitaria universal, gratuíta e de calidade é unha obriga das administracións públicas, e especialmente da Xunta de Galicia, como responsable da xestión do sistema sanitario galego.

A atención primaria constitúe a porta de entrada ao sistema e o nivel asistencial máis próximo á cidadanía. É o espazo onde se prevén enfermidades, se atenden os primeiros síntomas e se realiza o seguimento das patoloxías crónicas. Cando a atención primaria falla, todo o sistema sanitario se resinte: medran as urxencias hospitalarias, agrávanse os problemas de saúde e aumenta a desigualdade no acceso á asistencia.

Porén, a realidade actual amosa que o Goberno galego leva anos desatendendo este nivel asistencial, sen planificación nin investimento suficiente. A falta de profesionais, a precariedade laboral e a escasa reposición de prazas están a provocar unha situación de colapso en moitos centros de saúde de Galicia.

O caso do Centro de Saúde de Cariño é unha mostra especialmente grave desta situación. As veciñas e veciños do municipio están a sufrir demoras de máis de 13 días para poder acceder a unha cita coa médica ou médico de cabeceira. Esta espera, absolutamente inasumible, supón unha vulneración do dereito á atención sanitaria en tempo e forma, e pon en risco a saúde das persoas que precisan atención urxente ou seguimento continuado.

A situación é particularmente preocupante nun concello como Cariño, onde moitos pacientes son persoas maiores con enfermidades crónicas e con dificultades de mobilidade. A ausencia dunha resposta inmediata pola parte da Xunta de Galicia supón unha discriminación territorial evidente e unha mostra máis do deterioro progresivo da atención primaria en todo o país.

É imprescindible que o Goberno galego actúe de maneira inmediata, reforzando o cadro de persoal médico e de enfermaría, mellorando a organización interna e garantindo que ningunha persoa teña que agardar máis de 48 horas para ser atendida pola súa médica ou médico de cabeceira. A saúde non pode esperar, e a igualdade de acceso aos servizos públicos tampouco.

Por todo exposto o Grupo Municipal Socialista no Concello de Cariño, propón ao Pleno da Corporación a adopción dos seguintes ACORDOS: 

Solicitar á Xunta de Galicia:

1. Adoptar con carácter inmediato as medidas necesarias para garantir que as persoas usuarias do Centro de Saúde de Cariño poidan acceder a unha cita coa súa médica ou médico de cabeceira nun prazo máximo de 48 horas, conforme ás recomendacións da OMS e aos estándares de calidade asistencial.
2. Reforzar de maneira urxente o cadro de persoal médico e de enfermaría do devandito centro, asegurando a cobertura de todas as prazas estruturais e substitucións.

En Cariño, a 5 de novembro de 2025

A  Agrupación Socialista de Cariño, en colaboración co Grupo Provincial Socialista, convoca a todas ás asociacións e persoas interesadas a unha xuntanza informativa sobre as liñas xerais e novidades das axudas para o ano 2026 da Deputación da Coruña.

O acto terá lugar o martes, 2 de decembro, a partir das 20.30 horas, no Local Social da Casa do Concello (Avda. Da Paz, s/n), e contaremos coa presencia de Rosa Ana García, Deputada que leva as áreas de Industria, Emprego, Política demográfica e Medio Ambiente na Deputación da Coruña.

O 25 de novembro é un día que nos atravesa como sociedade, coa conmemoración do Día Internacional da Eliminación da Violencia contra as Mulleres. Unha data de memoria, de denuncia e de compromiso. Unha xornada para recordar a todas as mulleres asasinadas a mans da violencia machista, para acompañar ás superviventes e ás súas familias. E un día de determinación colectiva para renovar o compromiso do noso país cunha vida libre de violencia para todas as mulleres e nenas.

A Violencia de Xénero é a expresión máis extrema dunha desigualdade histórica. É unha violación de dereitos humanos, un ataque directo aos valores democráticos e á dignidade das mulleres, polo mero feito de selo. Trátase dunha violencia estrutural dirixida cara ás mulleres polo mero feito de selo. Non é un fenómeno illado. É un problema de Estado e combatelo non é só unha responsabilidade política, senón un imperativo ético.

España avanzou con firmeza nesta loita, grazas a unha política pública sostida, un marco lexislativo robusto e unha rede de alianzas institucionais e sociais que resistiu mesmo nos contextos máis adversos. Este ano conmemoramos ademais un fito decisivo, como a renovación do Pacto de Estado contra a Violencia de Xénero, aprobado o pasado mes de febreiro con amplo apoio parlamentario. Este novo acordo amplía o número de medidas de 290 a 461, recoñece novas formas de violencia –económica, dixital e vicaria– e reforza a súa dotación orzamentaria con 1.500 millóns de euros para os próximos cinco anos.

En coherencia con ese Pacto de Estado, o Goberno aprobou o anteproxecto de Lei Orgánica de medidas fronte á violencia vicaria, que por primeira vez recoñece como delito autónomo, no noso Código Penal, este tipo de violencia que se exerce contra as mulleres a través das súas fillas e fillos.

A violencia vicaria é a forma máis cruel de violencia machista. Ataca onde máis doe. Hoxe, máis de 1.400 menores están en risco segundo o sistema VioGén (Sistema de Seguimento Integral nos casos de Violencia de Xénero). Lexislar sobre esta realidade era un clamor social. Con esta lei, desde o PSOE buscamos visibilizar, previr, sancionar e erradicar esta violencia, situando unha vez máis a España na vangarda da igualdade e reafirmando algo esencial: estamos coas vítimas, nunca cos agresores.

A realidade obríganos a non baixar a garda: 36 mulleres foron asasinadas este ano. Desde 2003, son 1.331 as vidas arrebatadas. Desde 2013, 65 menores foron asasinados en contextos de violencia vicaria e 486 nenas e nenos quedaron orfos. Detrás de cada cifra hai un nome, unha historia, unha familia rota. Non hai espazo para a indiferenza nin para a equidistancia. Ou estamos coas vítimas, ou alimentamos o silencio que as desprotexe.

Fronte ao negacionismo e os discursos que trivializan a dor das mulleres, o PSOE reitera o seu compromiso inquebrantable co avance de políticas públicas que protexan e reparen ás vítimas, que impidan calquera forma de retroceso, e que garantan unha resposta integral, eficaz e especializada. É necesario seguir investindo en prevención, educación, formación, atención especializada, protección institucional e xustiza con perspectiva de xénero.

Así como seguir traballando para que con urxencia se aprobe a lei de violencia vicaria e para que o Pacto de Estado Contra a Violencia de Xénero se cumpra e implante de forma efectiva.

Somos plenamente conscientes de que o contexto nacional, europeo e internacional esixe estar alerta. Medran discursos autoritarios que cuestionan consensos fundamentais sobre os dereitos das mulleres. Defender a igualdade e combater a violencia machista é defender a democracia. Negar esta violencia, desacreditar a quen traballa coas vítimas ou faltar ao respecto ás mulleres asasinadas non só é inaceptable: é profundamente perigoso. Quérennos devolver a un tempo de silencio e desigualdade atacando directamente ao feminismo e aos dereitos conquistados.

Fronte a este retroceso, os e as socialistas posicionámonos con claridade: non permitiremos que se poña en xogo a igualdade, a liberdade nin a seguridade das mulleres. Han atoparnos enfronte, xunto coas vítimas e con todas as persoas que defenden unha sociedade xusta, libre e democrática.

Hoxe, como cada 25 de novembro, unímonos á chamada de Nacións Unidas e reafirmamos un compromiso que é político, pero tamén vital: non retroceder nin un milímetro. Porque é posible -e é a nosa obriga- acabar coa violencia contra as mulleres. E porque cada vida salvada é a maior vitoria dunha sociedade democrática.

O PSdeG-PSOE de Cariño reclama mediante unha moción no pleno municipal que se implante unha sección da Escola Oficial de Idiomas (EOI) no instituto Cabo Ortegal do municipio.

O Grupo Parlamentario Socialista presentará paralelamente unha emenda aos orzamentos da Xunta de Galicia co obxectivo de incluír unha partida para a implantación de dita sección.

A continuación, podes ler a moción presentada e que se debatirá no Pleno Municipal:

O Grupo Municipal Socialista no Concello de Cariño de acordo ao disposto no artigo 71.3 do Regulamento de Organización, Funcionamento e Réxime Xurídico das Entidades Locais desexa elevar ao pleno  Municipal a seguinte MOCIÓN.

EXPOSICIÓN DE MOTIVOS

O Concello de Cariño atópase na Comarca de Ortegal, bastante illado e con carencias no transporte público, o que imposibilita  a asistencia da nosa veciñanza ás localidades de Ferrol, Cedeira ou As Pontes, municipios máis cercanos que contan con aulas da Escola Oficial de Idiomas, tendo en conta que a maior parte das clases teñen lugar pola tarde-noite.

Nestes últimos anos, detectamos un crecente interese da poboación do Concello e da comarca en ampliar e mellorar as competencias en linguas, especialmente a inglesa, así como persoas que xa teñen certo coñecemento da mesma e desexan homologar os seus estudos.

Que o Concello de Cariño acollera, tanto no verán de 2024 coma no de 2025, unha charla da Escola Oficial de Idiomas, sección Cedeira, demostra que o equipo de goberno tamén detectou esta necesidade entre a poboación cariñesa.

Xa no ano 2017, tanto a Dirección como o Consello Escolar do centro IES Cabo Ortegal, así como o Pleno do Concello de Cariño, aprobaron por UNANIMIDADE a solicitude dunha sección da Escola de Idiomas para o IES Cabo Ortegal de Cariño.

Nese momento, a dirección do Centro destacou que permanece aberto de luns a venres en horario de tarde, o que facilitaría a implantación da sección solicitada, pois existen aulas dispoñibles e persoal de administración e servizos para cubrir as necesidades que puideran xurdir. Tan só se necesitaría cubrir as prazas do profesorado que imparta os distintos niveis.

Por todo exposto o Grupo Municipal Socialista no Concello de Cariño, propón ao Pleno da Corporación a adopción dos seguintes ACORDOS: 

– Solicitar á Dirección do IES Cabo Ortegal un informe sobre a viabilidade da posta en marcha dunha sección da Escola Oficial de Idiomas no IES Cabo Ortegal de Cariño.

– Solicitar o apoio á iniciativa, se así o consideran, da ANPA, do Claustro de Profesorado e da Dirección do IES Cabo Ortegal.

– Instar ao Pleno do Parlamento de Galicia a votar favorablemente a emenda aos orzamentos de 2026 da Xunta de Galicia presentada polo Grupo Socialista para a implantación dunha sección da Escola Oficial de Idiomas no IES Cabo Ortegal de Cariño.

– Solicitar á Xunta de Galicia a creación dunha sección da Escola Oficial de Idiomas no IES Cabo Ortegal de Cariño.

O Grupo Municipal Socialista celebra que Portos de Galicia e o Concello de Cariño mantiveran unha reunión para tratar a proposta de reversión de terreos sen uso portuario, e pola que levamos preguntando en cada Pleno desde o inicio do mandato.

Este procedemento de reversión, que inclúe a 24 concellos galegos máis, foi iniciado en 2021 polo goberno municipal socialista, e negociado directamente co Goberno de España e a Xunta a través da Federación Galega de Municipios e Provincias (FEGAMP).

Aínda sendo un avance, a proposta que hoxe fai Portos deixa sen solucionar varios dos problemas máis importantes que afectan á superficie a revertir, como son o estado ruinoso de varias naves, ou a non reversión da superficie adicada a ubicar as atraccións durante as festas e o mercado dos venres, por poñer uns exemplos.

Polo tanto non se recollen todos os terreos solicitados no acordo plenario aprobado por unanimidade en novembro de 2023.

O venres 14 de novembro solicitamos unha reunión da Xunta de Portavoces para tratar á maior brevidade a proposta.

O xoves 25 de setembro tivemos Pleno Ordinario. Pasamos a explicar a nosa posición nos asuntos que se trataron, así como os rogos e preguntas que realizamos dende o Grupo Municipal Socialista.

Sobre a Conta Xeral de 2024. A situación económica do Concello é boa, moi alonxada da imaxe catastrófica que manifesta o equipo de goberno do Partido Popular dende que chegou ao goberno: o resultado orzamentario do exercicio foi de 348.818,46€ e os fondos bancarios a 31/12/2024 ascendían a 1.204.170,76€. O remanente de tesourería, o que podemos entender como os aforros, suman 1.078.593,95€.

Rogamos á Alcaldesa que utilice parte destes fondos dos que dispón o Concello para realizar inversións moi necesarias, tal e como realizaron concellos veciños.

Preguntamos novamente á Alcaldesa, xa que tamén o fixemos na Comisión de Contas do mes de agosto, o motivo polo que a aportación da Xunta de Galicia ao Concello de Cariño no que respecta ao servizo de Dependencia baixou nuns 96.912,55€. Segundo os datos da liquidación de ingresos, no ano 2023 a Xunta de Galicia ingresou ao Concello de Cariño a cantidade de 349.119,34€ fronte aos 252.206,79€ que ingresou en 2024. Non nos deron resposta nin na Comisión nin no Pleno.

Polo que vimos de comprobar a través das liquidacións ás persoas usuarias do servizo de Dependencia, o número de persoas atendidas en xuño de 2023 eran 46, mentres que en agosto de 2025 o Concello presta servizo a 33, é dicir, 13 persoas menos desde que goberna o Partido Popular.

Apoiamos a moción sobre o SAF e votamos en contra da emenda que presentou o Partido Popular. Puxemos de manifesto a hipocresía do PP, reclamando máis financiación ao Estado para a dependencia logo de non aceptar a quita da débeda duns 4.010 millóns de euros, o que permitiría unha rebaixa no pago de intereses e, con este aforro, incrementar a inversión en políticas sociais.

A Xunta de Galicia gobernada polo Partido Popular aplica a política do “eu invito pero pagan outros”. Un exemplo é a financiación do SAF no Concello. Dos máis de 20€ de custo por hora, a Xunta ingresa 12€ (nos que está incluída a aportación do Ministerio) sendo o Concello o que paga o resto.

Comezamos o punto de Rogos e Preguntas amosando a nosa preocupación pola obra do Polideportivo, xa que a Alcaldesa indicou que a licitación quedou deserta.

Como xa é tradición en tódolos plenos, pedimos a creación de video-actas, coa posibilidade de que toda a veciñanza poda ver os plenos en streaming. Tamén solicitamos que colguen na páxina web as actas (non supón ningún custo económico para o Concello), para que a cidadanía poda ler os acordos.

Rogamos ao equipo de goberno que cumpla a lei e atenda as peticións de documentación e reunións que plantexamos desde o Grupo Municipal Socialista e que, despois de meses, seguen sen respostar:

– 24/02/2025: Petición conxunta Xunta Portavoces acordo plenario Memoria Democrática.

– 24/07/2025: Petición conxunta documentación Centro de Día e Residencia.

– 29/08/2025: Documentación SAF.

– Xullo – Agosto 2025: Documentación Travesía Centeás pola praga de pulgas.

Preguntamos se hai algún avance na obra das rúas Río Miño, Río Sor e Sanchola, que quedou deserta en decembro de 2023, e non a volveron a licitar. A Alcaldesa di que non.

O Concello ten sen licitar obras do Plan anual de Obras e Servizos financiado pola Deputación da Coruña (POS) por valor de 658.077,16€, sen contar o plan adicional que aprobamos en agosto por importe de 149.768,96€. Teñen un calendario para poñer en marcha as licitacións e executar as obras? Responden que non.

Rogamos que publiquen, tal e como prometeron, as analíticas da auga na páxina web. As últimas publicadas son as de xuño.

Recordamos, xa que o falamos no Pleno anterior, que revisen antes de facer públicos os cartaces de actividades organizadas polo Concello, xa que non levan os logos oficiais.

Preguntamos se se vai a organizar en Cariño unha charla sobre comunidades enerxéticas locais, organizadas por Seitura22, tal e como están a facer noutros concellos veciños. A Alcaldesa di que non.

Logo da renuncia da persoa que realizaba a asistencia técnica de Urbanismo, preguntamos quen se vai a facer cargo dos expedientes e licencias urbanísticas, e se van a sacar a praza de Arquitecto/a. Informan que solicitaron axuda á Deputación, pero non saben cando vai a vir alguén. Mostramos a nosa preocupación polos expedientes do PXOM e PEPRI xa que nesta situación van a continuar paralizados.

Chamounos a atención que o Concello firmou o 23 de abril o convenio anual de incendios, pero non se adxudicou ata o 22 de agosto, 4 meses despois, xusto cando ardía Galicia por todos lados. Cal foi o motivo de que tardaran tanto en adxudicar? A Alcaldesa responde que non se presentaron empresas.

O pasado 4 de xuño vimos unha nova en La Voz de Galicia co seguinte titular: “PORTOS abordará después del verano la reversión de los terrenos de los últimos 8 concellos que lo han solicitado”. Entre estes oito concellos está Cariño. Algún avance? Temos data para a reunión? A Alcaldesa responde que non.

En abril, o Concello anunciou en redes sociais que a Xunta de Galicia aprobou unha axuda de 126.427,59€ para a adquisición dun camión para a recollida de residuos. Vaise a comprar? Cando pensan licitar? O goberno informa que o Concello tiña que aportar 43.547,16€, e que non van a comprar o camión xa que renunciaron á subvención.