PSOE Cariño

Arrancamos o ano 2025 na nosa web co resumo do Pleno Extraordinario celebrado no Concello de Cariño o pasado luns 30 de decembro. Explicamos os temas tratados e a nosa posición sobre os mesmos.

No primeiro punto da Orde do Día, tomou posesión como concelleira do Grupo Municipal Socialista a nosa compañeira María José Fraguela López. Ocupa o posto da compañeira Carmen del Río Fraguela que, como xa anunciamos no seu momento, tivo que renunciar por motivos laborais.

No segundo punto, votamos favorablemente a acta do Pleno Ordinario celebrado o 28 de novembro.

No terceiro punto da Orde do Día tratamos a aprobación do POS + ADICIONAL 1 2025 para gastos sociais extraordinarios.

O POS+2025 é un programa anual da Deputación da Coruña que financia obras e servizos dos concellos da provincia, cun reparto de fondos baseado en criterios obxectivos. Neste 2025 o plan conta coa maior financiación da súa historia, correspondéndolle ao noso Concello a cantidade de 532.251,34€, divididos en tres apartados:

– Investimentos ou gasto corrente: 414.660,93€

– Amortización de préstamos coa propia Deputación: 74.267,63€

– Gastos sociais extraordinarios: 43.322,78€

Os dous primeiros apartados deberán abordarse noutro Pleno antes do vindeiro 7 de febreiro (data límite de solicitude). Neste último Pleno tratamos o destino dos 43.322,78€. Segundo as bases da convocatoria, poden ser utilizados para investimentos ou gasto corrente do departamento de Servizos Sociais.

A proposta do Goberno Municipal é aplicalos integramente a gasto corrente de servizos sociais. O noso voto foi a favor, aínda que pedimos que se estudara a posibilidade de adquirir equipamento técnico asistencial (camas, grúas, etc.) para realizar préstamo ás persoas usuarias que non dispoñan do mesmo e facilitar a labor das familias e das traballadoras do servizo nos domicilios.

O punto cuarto tratou a aprobación da Conta Xeral do ano 2023.

Na nosa intervención solicitamos a presentación da Conta Xeral no prazo establecido na Lei (antes do 15 de outubro), e non o último día hábil do ano. Se a Conta Xeral non se aprobara antes de final de ano, o Concello non podería obter ninguna axuda ou subvención no ano 2025. O noso voto foi a favor.

Os datos principais da Conta Xeral son os seguintes:

– Dereitos recoñecidos netos (ingresos): 4.738.628,54€

– Obrigas recoñecidas netas (gastos): 3.801.258,74€

– Diferencia: +936.133,19€

– Resultado presupostario axustado: 311.814,81€

– Remanente de tesourería (aforros do ano): 530.262,71€

Polo que podemos observar, o Concello no ano 2023 ingresou case un millón de euros máis dos que gastou. Ao longo do ano, teñen lugar ingresos e gastos que corresponden a outros anos, e que hai que sumar ou restar á diferencia entre os dereitos e as obrigas, dando un resultado presupostario do ano de 311.814,81€.

O remanente de tesourería reflicte, ao peche do exercicio, a situación de liquidez da entidade que se atopa dispoñible para financiar gastos, resultando un indicador moi importante para valorar a solvencia financeira a curto prazo da entidade local. O resultado no ano 2023 é de 530.262,71€.

Na toma de posesión do actual Equipo de Goberno (17/06/2024) os fondos líquidos nos bancos ascendían a 644.552,39€ mentres que ao peche do exercicio anterior (31/12/2023) a cantidade ascendía a 827.224,39€.

Como demostran os datos (obtidos do decreto de Alcaldía que aproba a liquidación e do informe de Intervención da Conta Xeral) a situación económica do Concello é boa, moi lonxe do catastrofismo que manifesta o Goberno Municipal do Partido Popular dende a súa toma de posesión.

Ao tratarse dun Pleno Extraordinario, non houbo punto de Rogos e Preguntas.

O pasado 18 de decembro a Xunta de Galicia publicaba na súa páxina web unha nota de prensa na que informaba sobre o acordo ao que chegaban co Concello da Guarda sobre o procedemento de reversión de terreos.

Segundo informan na propia nota, “a reunión co Concello da Guarda dá continuidade ás celebradas nos últimos días cos concellos de Cangas, Vilanova de Arousa e Foz para abordar a tramitación da primeira fase de reversións de terreos innecesarios para o uso portuario á Administración Xeral do Estado. O obxectivo é pechar as propostas definitivas destes portos para trasladalas, xunto coa de Santa Cruz, en Oleiros, xa pechada dado que inclúe o total da superficie portuaria, á Consellería de Facenda, que a elevará a proposta conxunta desta primeira fase ao Consello da Xunta. Unha vez aprobada polo Executivo galego, remitirase ao Ministerio de Transición Ecolóxica para a súa tramitación e, no seu caso, aprobación final en Consello de Ministros”.

O Presidente de Portos manifestou na Comisión de Pesca do Parlamento de Galicia, a pregunta do Grupo Parlamentario Socialista, que as devolucións ao estado dos terreos destes cinco portos (Cangas, Vilanova de Arousa, Foz, A Guarda e Santa Cruz, en Oleiros) “serán ratificadas polo Consello Rector de Portos de Galicia en xaneiro tras o Nadal” (nota de prensa da Xunta de Galicia de data 20 de decembro).

Dende a Agrupación Socialista de Cariño lamentamos que este Concello non sexa unha prioridade para a Xunta de Galicia e que o propio equipo de goberno municipal do Partido Popular non solicite con urxencia o inicio do expediente por parte de Portos de Galicia tendo en conta, ademais, que o Pleno aprobou por unanimidade unha moción presentada polo Grupo Municipal Socialista sobre este tema.

Procedemento de reversión

A Lei de Costas obriga á Xunta de Galicia a devolver ao Estado os espazos portuarios que xa non están en uso, podendo ser cedidos con posterioridade aos Concellos unha vez desafectados, cesión que terá carácter gratuíto segundo a lei.

No caso de Cariño, podemos citar como exemplo destes espazos a Praza Roxa, o “campín”, antigas fábricas, os terreos onde están situados a Casa do Concello ou o Mercado, etc. Na actualidade o Concello, ademais de encargarse do mantemento, ten que pagar a Portos de Galicia polo seu uso. Unha vez aprobada a reversión, o Concello aforraría moitos cartos que lle estamos pagando a dita entidade.

Dando continuidade á entrada anterior, completamos aquí o resumo do acontecido no Pleno Ordinario no Concello de Cariño celebrado o xoves 28 de novembro.

No punto cuarto da Orde do Día tomamos en consideración a renuncia, moi ao seu pesar e por motivos laborais, da nosa compañeira Carmen del Río. Aproveitamos este texto para agradecerlle o seu traballo nestes anos, tanto no Goberno Municipal na lexislatura anterior como na oposición durante a lexislatura actual, e desexámoslle moito éxito na súa carreira profesional.

Pasamos ao punto final de Rogos e preguntas. Dende o Grupo Municipal Socialista plantexamos os seguintes asuntos:

• Pedimos a creación de video-actas, coa posibilidade de que toda a veciñanza poida ver os Plenos en streaming.
• Logo dunha conversa coa Federación Galega de Montañismo, solicitamos a instalación da sinalización do punto de escalada “O Cravadoiro”, situado en Landoi. Tamén comentamos a necesidade de limpeza do acceso ás vías.
• O martes 26 de novembro o Concello publicou no BOP as bases do campamento Concilia Cariño Nadal 2024/2025. Quedamos sorprendidos cando vemos que as inscricións teñen que realizarse a través da páxina web da empresa adxudicataria do contrato, e non a través do rexistro do Concello. Tamén nos sorprendeu un apartado da inscrición que di que se as familias non envían a documentación necesaria antes das 24 horas seguintes de realizar a solicitude, esta enténdese desistida, saltando, ao noso entender, a lei de procedemento administrativo. O Equipo de Goberno informa que o vai a revisar.
• Recordamos a petición do pintado vial da parada de taxis que o colectivo de taxistas de Cariño fixo por escrito hai 9 meses.
• Preguntamos pola situación do Plan Especial do Casco Antigo. A Alcaldesa informa que segue igual, que non hai avances.
• Solicitamos información sobre a obra “renovación de pavimentos nas rúas Río Miño, Río Sor e Sanchola”, aprobada en xaneiro de 2023. O Equipo de Goberno informa que segue igual, pendente de modificación do proxecto para volver a licitar, tal e como nos informaron no Pleno anterior.
• Na anterior lexislatura solicitamos para Cariño a implantación dun Aula Mentor. É un programa de formación a distancia para persoas adultas. A diferenza con outros programas é que dispón dun espazo físico para facilitar o acceso, información, orientación e matrícula no programa. Segundo comentan, estará dispoñible en breve.
• Preguntamos á Alcaldesa se hai algunha novidade sobre a cobertura da praza de médico de familia vacante no Centro de Saúde. Contesta que non se cubríu, e que está un médico interino.

O xoves 28 de novembro tivemos Pleno Ordinario no Concello de Cariño. Pasamos, a continuación, a explicar os temas tratados e a nosa posición sobre os mesmos.

Votamos favorablemente a acta do Pleno ordinario celebrado o 26 de setembro.

No punto segundo dase conta dos Decretos de Alcaldía dende a última sesión plenaria ordinaria: do 381/2024 de 20/09/2024 ata o 496/2024 de 25/11/2024.

No terceiro punto da Orde do Día tratamos diferentes mocións presentadas polos grupos municipais. O Grupo Municipal Socialista presentou tres mocións.

MOCIÓN SOBRE A CONVOCATORIA DE AXUDAS DO CONCELLO DE CARIÑO

Podes ver o texto completo desta moción aquí.

Propuxemos a adopción dos seguintes acordos:

1º.- Sobre as Subvencións e axudas para entidades sen fin de lucro do Concello de Cariño ano 2024: o incremento do orzamento das axudas ata 36.000€ e do importe máximo de axuda a cada asociación a 3.000€, cantidades que corresponderían ao importe das axudas de 2023 e 2024.

2º.- A convocatoria por parte do goberno municipal das Axudas para sufragar as actividades culturais, educativas e deportivas, que contan con consignación presupostaria de 8.000€ no orzamento municipal.

A moción saíu adiante cos votos a favor do PSdeG e BNG, e coa sorprendente abstención do PP. Logo de escoitar a explicación da súa postura, todo apuntaba a que votarían en contra. A Alcaldesa dixo que non era necesario convocar as axudas para os estudantes, xa que cubrían esta necesidade a través de emerxencia social. Pola nosa parte, manifestamos que as axudas de emerxencia social son axudas de último recurso, para momentos e familias moi vulnerables, e que se solicitan para necesidades concretas e puntuais. Non ten sentido obrigar ás familias a facer unha solicitude mensual, con todo o papeleo que supón, cando a convocatoria de axudas é única, baremable e abrangue todo o ano.

Sobre as axudas ás asociacións, o equipo de Goberno non entende necesario o incremento do orzamento xa que en anos anteriores ningunha asociación chegou a xustificar a cantidade completa. Dende o Grupo Municipal Socialista poñemos en dúbida esta afirmación, e solicitaremos a documentación das convocatorias anteriores para comprobalo. De todas formas, estamos a falar dunha convocatoria para dous anos, polo que entendemos que o lóxico é que se duplique o orzamento.

MOCIÓN SOBRE OS TERREOS DE PORTOS DE GALICIA SEN USO PORTUARIO

A Lei de Costas obriga á Xunta de Galicia a devolver ao Estado os espazos portuarios que xa non están en uso, podendo ser cedidos con posterioridade aos Concellos unha vez desafectados, cesión que terá carácter gratuíto segundo a Lei.

No caso de Cariño, podemos citar como exemplo destes espazos a Praza Roxa, o “campín”, antigas fábricas, os terreos onde están situados a Casa do Concello ou o Mercado, etc. O Concello, ademais de encargarse do mantemento, ten que pagar a Portos de Galicia polo seu uso.

En maio de 2023, a Demarcación de Costas iniciou o procemento de reversión dos terreos e en novembro, no Pleno do Concello, aceptamos recibir os terreos e darlles un uso público de interese xeral. Para aprobar o expediente, é necesario que Portos de Galicia lle dea o visto e prace ao procedemento.

A nosa proposta ao Pleno (podes ver o texto completo da moción aquí) foi a seguinte:

– Instar a Portos de Galicia e á Xunta de Galicia a que cumpran coa maior celeridade posible os acordos tomados coa Federación Galega de Municipios e Provincias en setembro de 2021, e faciliten a tramitación da declaración de innecesariedade solicitada polo Concello de Cariño.

– Solicitar a Portos de Galicia a modificación da Lei 6/2017 de Portos de Galicia e exima do pago de taxas aos concellos galegos pola utilización de espazos portuarios -especialmente en aqueles en desuso- cando as concesións ou actividades temporais dos Concellos teñan un evidente interese público.

O Concello aforraría moitos cartos que lle pagamos a Portos de Galicia. A moción aprobouse por unanimidade.

MOCIÓN SOBRE A DRAGAXE NO PORTO E O DEPÓSITO NA BASTEIRA

A posición do Grupo Municipal Socialista está resumida aquí.

A nosa proposta ao Pleno foi a seguinte:

– A convocatoria dunha reunión da Xunta de Voceiros do Concello, coa asistencia de persoal técnico de Portos de Galicia e da Demarcación de Costas.

Solicitar a Portos de Galicia, administración promotora das obras:

– Que a cidadanía teña acceso a toda a documentación relativa ao proxecto.

– A suspensión definitiva dos traballos de depósito de area na praia da Basteira.

– A valoración dos danos causados polos traballos na praia e no sistema dunar e a análise do material depositado na mesma.

– A modificación do proxecto, depositando os sedimentos previstos na dragaxe no mar, e non nas praias da Concha ou A Basteira.

– A realización dun estudo de impacto ambiental para os traballos de dragaxe, tendo en conta que a maior parte teñen lugar en espazos da Rede Natura.

O PSdeG e o BNG votamos a favor (5 votos) e o PP votou en contra (3 votos).

O BNG presentou dúas mocións: unha sobre a dragaxe, aprobada tamén cos votos a favor de PSdeG e BNG e cos votos en contra do PP, e outra sobre a lingua galega, aprobada por unanimidade.

(completaremos este resumo nos vindeiros días)

No Pleno Ordinario do Concello de Cariño celebrado o xoves 28 de novembro o noso partido presentou tres mocións. De dúas delas (dragaxe no porto e depósito na praia da Basteira, e convocatoria de axudas do Concello) xa demos conta aquí en días pasados. Aquí reproducimos o texto da terceira, relativa ós terreos de Portos de Galicia sen uso portuario.

EXPOSICIÓN DE MOTIVOS

A Lei 22/1988, de 28 de xullo, de Costas, é o marco xurídico que define a protección e a utilización do dominio público marítimo-terrestre e especialmente  a ribeira do mar. O artigo 49 define a adscrición de bens de dominio público marítimo-terrestre ás Comunidades Autónomas para a construción de portos. No artigo 50 determínase o que acontece cando o espazo adscrito xa non é utilizado para un fin portuario, como acontece no caso de Cariño. Os bens de dominio público marítimo-terrestre adscritos a unha Comunidade Autónoma conforme ao previsto no anterior artigo, que non sexan utilizados para o cumprimento do fin aos que se adscribiran, ou que sexan necesarios para a actividade económica ou o interese xeral, segundo os artigos 131 e 149 da Constitución, reverterán ao Estado, previa audiencia da Comunidade Autónoma, polo procedemento que se determine regulamentariamente, e daráselles o destino que en cada caso resulte procedente.

A Lei 22/1988 no seu artigo 18 establece que poderán ser desafectos os terreos deslindados como dominio público que por calquera causa perderan as súas características naturais de praia, acantilado ou zona marítimo terrestre previo informe preceptivo do Concello e da Comunidade Autónoma. No artigo 19 establécese que os terreos desafectos incorporaranse ao Patrimonio do Estado e, cando non se xulgue previsible a súa afectación, poderán ser cedidos gratuitamente ao Concello, condicionándose a cesión a que teñan  unha finalidade de servizo público dentro das competencias municipais.

Isto é, a Lei de Costas obriga á Xunta de Galicia a devolver ao Estado os espazos portuarios que xa non están en uso, podendo ser cedidos con posterioridade aos Concellos unha vez desafectados, cesión que terá carácter gratuíto segundo a lei.

Tras diversas reunións entre Concello de Cariño, Portos de Galicia e a Demarcación de Costas, con data 13 de decembro de 2018 o Concello de Cariño solicita a declaración de innecesariedade para o DPMT de determinados terreos adscritos ao ente autonómico Portos de Galicia para servizo do Porto de Cariño. Así mesmo, a súa posterior reversión ao Estado, desafectación e cesión á administración local.

Fundamenta a solicitude de innecesariedade dos devanditos terreos entre outros aspectos en:

1. Os terreos afectados atópanse totalmente integrados na trama urbana e inclúen numerosos edificios e espazos de uso público cotián -non portuario- polos que a administración local debe desembolsar periodicamente a Portos de Galicia unha elevadísima suma económica polo seu uso veciñal.
2. Todas e cada unha das áreas citadas (prazas, zonas verdes, antigas fábricas cedidas ao Concello…) deben ser conservadas pola administración local, entidade que por tanto non só paga taxas por uso senón que ademais sufraga tales gastos de mantemento.
3. Existe incumprimento de artigo 105.2.b do Real Decreto 876/2014, do 10 de outubro, polo que se aproba o Regulamento Xeral de Costas, ao existir unha ocupación para usos non portuarios en máis do 10 % da superficie de terra do Porto de Cariño.

En setembro do ano 2021 a Federación Galega de Municipios e Provincias (FEGAMP) chegou a un acordo con Portos de Galicia e a Xunta de Galicia para resolver esta situación, co obxectivo final de que os Concellos reciban de forma gratuíta os espazos portuarios en desuso tal e como permite a Lei de Costas.

Portos de Galicia marcou o 15 de outubro de 2021 como data límite para que os Concellos presentasen as súas solicitudes e o Concello de Cariño fixo os trámites en tempo e forma.

Por Resolución da Dirección Xeral da Costa e o Mar de data 27 de abril de 2023 autorízase á Demarcación de Costas de Galicia para que leve a cabo a incoación do expediente de declaración de innecesariedade para a protección do dominio público de terreos adscritos a Portos de Galicia, afectados polos deslindes aprobados por OO:MM: do 9 de novembro de 1971 e 3 de xuño de 1994, no termo municipal de Cariño (A Coruña).

O 30 de novembro de 2023 o Pleno Municipal aproba por unanimidade:

PRIMEIRO: Solicitar a declaración de innecesariedade dos terreos especificados no informe técnico de data 22/05/2023, para a posterior reversión, desafectación e cesión a favor do Concello de Cariño a efectos de aplicación do previsto nos artigos 4.5 e 18 da Lei 22/1988 de Costas, Disposición Adicional Terceira da Lei 2/2013 de modificación da Lei 22/1988, así como os artigo 27.1ª e 38 do Regulamento Xeral de Costas e Lei 33/2003, ao respecto da declaración de innecesariedade.

SEGUNDO: Acordar que de producirse a desafectación e cesión dos terreos ao Concello de Cariño, estes se adicarán ao uso público e gratuíto.

TERCEIRO: Aceptar e tomar coñecemento da situación rexistral das parcelas/inmobles afectados obxecto de desafectación, aos efectos establecidos no artigo 136.2 da Lei 33/2003.

Por todo exposto, o Grupo Municipal Socialista no Concello de Cariño, propón ao Pleno da Corporación a adopción dos seguintes

ACORDOS:

Unha vez iniciado o expediente por parte da Demarcación de Costas e aprobado por parte do Pleno Municipal:

– Instar a Portos de Galicia e á Xunta de Galicia a que cumpran coa maior celeridade posible os acordos tomados coa Federación Galega de Municipios e Provincias en setembro de 2021, e faciliten a tramitación da declaración de innecesariedade solicitada polo Concello de Cariño.

– Solicitar a Portos de Galicia a modificación da Lei 6/2017 de Portos de Galicia e exima do pago de taxas aos concellos galegos pola utilización de espazos portuarios -especialmente en aqueles en desuso- cando as concesións ou actividades temporais dos Concellos teñan un evidente interese público.

En Cariño, a 24 de novembro de 2024

A pasada fin de semana o noso partido celebrou en Sevilla o seu 41º Congreso Federal baixo o lema España adelanta por la izquierda. Aínda que o inicio do ciclo congresual estaba previsto para o 2025, a dirección do partido decidíu adiantalo un ano para encarar a segunda parte da lexislatura coas estruturas orgánicas renovadas e novas propostas programáticas.

Nun potente discurso de clausura, Pedro Sánchez insuflou ánimos á militancia, confirmou a súa intención de concurrir ás eleccións xerais en 2027 e realizou algúns anuncios importantes, como a creación dunha empresa pública de vivenda dependente da administración central.

A nova Executiva é claramente continuísta nos postos máis importantes, con Sánchez na Secretaría Xeral, María Jesús Montero na Vicesecretaría Xeral, Santos Cerdán na Secretaría de Organización e Cristina Narbona na Presidencia, pero introduce tamén caras novas. Galicia está representada por César Mogo (Exterior), Abel Caballero (vocal) e Inés Rey (en canto Vicepresidenta Primeira da FEMP), ós que temos que engadir a viguesa Emma López, actualmente afincada en Madrid, na importante Secretaría de Política Económica e Transformación Dixital.

O congreso servíu tamén para debatir e actualizar as propostas programáticas. Cos seus 145 anos de historia, o PSOE mantén os ideais de igualdade e xustiza social que inspiraron a súa fundación. Ó mesmo tempo, atopámonos actualmente nun mundo cambiante no que, sobre a base de ditos principios, é necesario afrontar retos cruciais: a desigualdade, as transformacións no mercado de traballo, o acceso á vivenda, as mudanzas demográficas e os fenómenos migratorios, o cambio climático, o auxe da ultradereita e do populismo reaccionario, o cuestionamento do coñecemento racional e científico, os dereitos reprodutivos, a dixitalización e as novas tecnoloxías… De todo elo falouse neste cónclave.

Como é costume no noso partido, o congreso de Sevilla supón ademais o inicio dun ciclo congresual que incluirá tamén, nos vindeiros meses, congresos autonómicos, provinciais e locais. A Agrupación Socialista de Cariño está participando activamente neste proceso, sobre o que seguiremos informando nesta web.