PSOE Cariño

O 8 de marzo de 2026 volvemos atoparnos nas rúas, nos centros de traballo, nas aulas e tamén nas redes. Convócanos unha certeza política e moral: a igualdade entre mulleres e homes segue sendo unha tarefa pendente, unha conquista que debemos defender e alargar fronte a quen pretende arrebatárnola. Este século, que prometía horizontes de xustiza e emancipación, móstranos o perigoso avance de forzas reaccionarias que queren devolvernos ao silencio. E as mulleres estamos na primeira liña dese retroceso. En América, en Rusia, en Oriente Medio, en Europa e en España, a ultradereita ocupa institucións e difunde a mensaxe de que a igualdade é un privilexio e non un dereito. Hoxe afirmamos que cada paso atrás nos dereitos das mulleres é un golpe contra a democracia mesma. E que o feminismo, que pon no centro da súa esencia ás mulleres como suxeito activo, é internacionalista por natureza.

Vivimos nun mundo atravesado por pantallas, redes e algoritmos que organizan o noso traballo, as nosas relacións e ata as nosas emocións. A revolución dixital cambiou os espazos de poder. Neste novo escenario, as mulleres construímos comunidade, creatividade e resistencia. Fixemos da internet unha ferramenta de liberdade, de colaboración e de coñecemento, con grandes achegas ao ámbito educativo en proxectos como o Women’s legacy – Women’s Legacy Europe, que contribúen a superar a estafa cultural que borra ás mulleres de todas as disciplinas do saber.

Pero tamén somos branco dunha hostilidade constante. A machosfera dixital converteuse nunha rede organizada de acoso e odio que busca expulsar ás mulleres do espazo público. Sete de cada dez mulleres novas en España sufriron violencia en liña: insultos, difamación, manipulación de imaxes, ameazas. A violencia dixital non é menos grave por ser virtual; é a mesma violencia patriarcal que fóra da rede segue negando autoridade, liberdade e desexo ás mulleres. Por iso, desde o partido socialista témolo claro: sen igualdade dixital non haberá igualdade real.

As redes convertéronse no principal espazo onde se aloxan os referentes, onde se cimentan os soños de futuro e as relacións de nenas, nenos e adolescentes. Se o lugar onde se constrúen as conciencias cambiou, a educación debe cambiar tamén. Urxe unha coeducación que chegue á esfera dixital, que forme en pensamento crítico fronte aos discursos machistas e ensine a mirar con ollos feministas os corpos (para que non desafíen a anatomía e desborden a saúde mental das adolescentes), os algoritmos e as mensaxes que circulan pola rede. As nenas deben crecer libres de estereotipos, sen verse reducidas á súa imaxe nin convertidas en mercadorías para plataformas que se lucran coa súa exposición. Somos un partido abolicionista.

Rexeitamos frontalmente espazos como OnlyFans, que branquean o negocio do sexo e normalizan a explotación sexual ou presentan a cousificación do corpo feminino como un acto de liberdade. Así mesmo, son contornas perversas para os nenos que absorben a misoxinia a través dos contidos. Por iso, faise imprescindible ensinar aos nenos novas formas de ser homes, masculinidades que non reproduzan o control, a dominación nin a violencia. Porque desde o PSOE sabemos que para que as mulleres continúen avanzando, os homes han de camiñar con todo o seu compromiso tamén cara á igualdade.

Aínda por riba, nos últimos anos rexurdiron discursos que representan á muller dedicada exclusivamente ao fogar coma se iso fose sinónimo de liberación. Fronte a ese espellismo da “felicidade servil” que promulga o movemento tradwife, dicimos claramente: a submisión non é empoderamento. Esta nova versión do patriarcado, disfrazada de modernidade, mostra a dependencia económica e emocional como elección libre e feliz. Non se trata de xulgar as opcións persoais, senón de denunciar o perigo político de glorificar modelos de desigualdade coma se fosen progreso. O que se normaliza nas redes multiplícase, e cando os algoritmos premian o servilismo e castigan o pensamento crítico, a sociedade enteira retrocede. O feminismo fixo posible que as nenas soñen con ser científicas, enxeñeiras ou líderes. Non permitiremos que eses soños sexan borrados do futuro.

A transformación dixital ten un potencial enorme, pero non será liberadora se se constrúe sobre as mesmas desigualdades de sempre. Necesitamos unha axenda feminista para a era tecnolóxica, con políticas concretas que blinden os nosos dereitos. Desde o partido socialista propoñemos sen titubeos unha restrición aos espazos dixitais como mecanismo de protección das e dos menores neste salvaxe oeste. Hoxe, é preciso deseñar unha regulación das plataformas e os algoritmos, para que as grandes corporacións tecnolóxicas asuman a responsabilidade sobre os contidos que amplifican e sobre o impacto que xeran nas nosas vidas. No PSOE somos conscientes de que esa protección efectiva da infancia e a adolescencia ante os contidos sexualizados e violentos é necesaria, e como todos os avances sociais, esa iniciativa ten que vir da nosa man ou ninguén se fará cargo desta emerxencia. Tamén faremos todo o imposible para avanzar na formación a docentes e familias, e a implicación de todas as institucións.

Sabemos que a rede non é neutra. Detrás de cada plataforma hai ideoloxía, intereses económicos, decisións técnicas e políticas. Por iso, o feminismo debe estar presente no corazón dos debates sobre intelixencia artificial, ciberseguridade, datos e dereitos dixitais. É necesaria unha transformación cultural e política que cambie as regras do xogo para sempre. Queremos unha sociedade onde a tecnoloxía sirva á igualdade e non á dominación, onde o progreso mídase pola liberdade das mulleres e non polo beneficio duns poucos.

Este 8 de marzo non é unha data simbólica, é un chamamento á acción. Denunciamos o retroceso, o negacionismo machista e a banalización da violencia. Recoñecemos os avances conseguidos grazas ao traballo colectivo, as leis que amplían dereitos e as redes de sororidade que continúan sostendo a loita. Pero non baixamos a garda. Sabemos que defender a igualdade é defender a democracia, a liberdade e a xustiza social. Cada paso que damos cara a adiante mellora a vida de todas e todos.

Defender a igualdade dixital é defender a convivencia democrática e o dereito a unha vida sen violencia. Cada clic, cada palabra, cada xesto solidario pode ser un acto político. O feminismo naceu para conquistar o espazo público, e hoxe reivindica a conquista do espazo virtual. Porque sen igualdade na rede non haberá igualdade na vida. Porque o futuro, se quere ser humano, terá que ser feminista. E porque se o patriarcado se reinventa, nós tamén.

Por iso hoxe dicimos: non daremos nin un paso atrás fronte ao odio e a reacción. A loita feminista segue sendo o motor máis transformador do noso tempo, e desde o PSOE ese é o noso maior logro. E o noso maior orgullo: o feminismo das nosas filas decidido sempre a plantar cara a calquera tipo de violencia que se exerza sobre as mulleres polo mero feito de ser mulleres.

Viva a loita feminista.

Viva a loita das mulleres.

O Grupo Municipal Socialista no Concello de Cariño de acordo ao disposto no artigo 71.3 do Regulamento de Organización, Funcionamento e Réxime Xurídico das Entidades Locais desexa elevar ao pleno  Municipal a seguinte MOCIÓN.

EXPOSICIÓN DE MOTIVOS

A mobilidade é un dereito básico que garante a igualdade de oportunidades, a cohesión territorial e o acceso aos servizos públicos esenciais. Con todo, na comarca do Ortegal —e moi singularmente no concello de Cariño— a situación do transporte interurbano continúa a ser moi deficiente, cunha oferta de servizos claramente insuficiente e descoordinada.

O transporte público é unha peza esencial para asegurar que toda a cidadanía, viva onde viva, poida exercer plenamente os seus dereitos. Dispor de conexións dignas e regulares non é só unha cuestión de comodidade: é un requisito fundamental para acceder á sanidade, á educación, ao emprego, aos servizos administrativos e á participación social. Sen transporte público adecuado, a veciñanza ve limitadas as súas oportunidades, aumenta a desigualdade territorial e prodúcese un illamento que prexudica directamente a súa calidade de vida.

Os horarios actuais evidencian graves limitacións na mobilidade da veciñanza de Cariño, cunha oferta que non permite garantir necesidades básicas como o acceso ao seu hospital de referencia, a asistencia educativa ás vilas da contorna en horario compatible, nin a conexión con Ferrol, Narón ou cos principais polígonos industriais da contorna. A falta de coordinación entre servizos, a ausencia de ligazóns funcionais e a inexistencia dun sistema comarcal de transporte público impiden articular un modelo de mobilidade vertebrado nun territorio marcado pola dispersión e pola alta dependencia dos servizos públicos de transporte.

Esta realidade provoca un efecto claro: a veciñanza de Cariño está illada dentro da súa propia comarca, sen poder exercer en condicións de igualdade dereitos tan básicos como estudar, acudir ao seu hospital de referencia, traballar ou realizar xestións cotiás. A Xunta de Galicia leva anos prometendo melloras nos contratos do transporte público, mais a situación permanece estancada e sen dar resposta ás necesidades reais da cidadanía.

Por todo exposto o Grupo Municipal Socialista no Concello de Cariño, propón ao Pleno da Corporación a adopción dos seguintes ACORDOS: 

Instar á Xunta de Galicia a reforzar de maneira inmediata as conexións de transporte público interurbano entre Cariño e Ferrol, garantindo frecuencias suficientes en franxas de mañá, mediodía e tarde para permitir mobilidade laboral, educativa e asistencial.

Instar á Xunta de Galicia a:

1. Articular un sistema comarcal de transporte no Ortegal, con liñas e horarios coordinados entre Cariño, Mera, Cedeira, Ortigueira, Ferrol e Narón, que inclúa:
   1. Ligazóns efectivas cos polígonos industriais.
   2. Coordinación entre operadores para garantir transbordos útiles.
   3. Servizos suficientes en fin de semana nas franxas básicas.
2. Garantir unha conexión axeitada entre Cariño e Cedeira (centro máis próximo que dispón dunha ampla oferta de FP) que permita ao alumnado chegar ao inicio das clases en horarios compatibles co horario escolar, evitando chegadas excesivamente anticipadas.
3. Incorporar estas melloras no novo marco contractual do transporte público de Galicia, así como na planificación orzamentaria correspondente ao exercicio 2026.

Instar ao Goberno Municipal a que poña en marcha un buzón de Queixas e Suxerencias sobre o transporte público na comarca e posteriormente darlle traslado das mesmas á empresa concesionaria do servizo e a DX de Mobilidade da Xunta de Galicia.

O Grupo Municipal Socialista de Cariño defenderá no Pleno municipal previsto para finais deste mes de xaneiro unha moción para reclamar á Xunta de Galicia unha mellora inmediata e unha planificación seria do transporte público interurbano na comarca do Ortegal.

A iniciativa nace dunha constatación clara: a mobilidade non pode depender de ter coche propio nin pode converterse nunha carreira diaria de horarios imposibles. Para o PSdeG, o transporte público é un dereito básico, porque condiciona o acceso a cuestións tan esenciais como ir ao médico, estudar, traballar ou facer xestións administrativas, e é tamén unha ferramenta clave para frear o illamento das zonas máis periféricas.

A moción recolle a situación que padece a veciñanza de Ortegal e, en particular, de Cariño: faltan frecuencias e faltan encaixes reais cos horarios de vida. Por iso, o PSdeG reclama á Xunta que deixe de tratar o transporte como un servizo residual e actúe con medidas concretas, empezando por reforzar de maneira inmediata as conexións entre Cariño e Ferrol, con frecuencias suficientes en franxas de mañá, mediodía e tarde para garantir mobilidade laboral, educativa e asistencial.

Pero a proposta vai máis alá dunha liña concreta: o PSdeG-PSOE defende que é imprescindible articular un sistema comarcal de transporte no Ortegal, con liñas e horarios coordinados entre Cariño, Mera, Cedeira, Ortigueira, Ferrol e Narón, que permita transbordos útiles e conexións efectivas tamén cos polígonos industriais. A moción inclúe igualmente a necesidade de que haxa servizos suficientes en fin de semana nas franxas básicas, para que a comarca non quede “apagada” en ningún momento.

A cuestión educativa ocupa tamén un lugar central: o texto reclama garantir unha conexión axeitada Cariño–Cedeira, tendo en conta que Cedeira é o centro máis próximo con ampla oferta de FP, para que o alumnado poida chegar ao inicio das clases con horarios compatibles e sen “chegadas excesivamente anticipadas” que hoxe son consecuencia directa dunha mala planificación.

Para o PSdeG, esta non é unha discusión menor nin unha demanda simbólica: por iso a moción esixe que estas melloras se incorporen ao novo marco contractual do transporte público de Galicia e tamén á planificación orzamentaria de 2026, é dicir, que se traduzan en compromisos e en recursos, non en anuncios.

“Non é admisible que haxa veciñanza que quede illada na súa propia comarca por falta de frecuencias e coordinación. O transporte público non é un luxo: é igualdade”, sinala o voceiro do Grupo Municipal Socialista en Cariño, Jonathan Miranda.

A iniciativa inclúe ademais unha medida práctica para recoller a realidade diaria do servizo: instar ao Goberno municipal a poñer en marcha un buzón de queixas e suxestións sobre o transporte público, para trasladar despois as incidencias á empresa concesionaria e á Dirección Xeral de Mobilidade da Xunta con información concreta e útil.

O PSdeG lembra tamén que esta reivindicación non se limita ao eido municipal: o partido impulsou igualmente iniciativas no Parlamento de Galicia para demandar solucións e compromisos da Xunta. E, precisamente por iso, os socialistas denuncian a incoherencia do PP, que “aquí vota a favor” de reclamar melloras cando se debate nos concellos, pero despois “vota en contra” no Parlamento, impedindo que esas demandas se convertan en cambios reais e financiados.

O goberno autonómico do Partido Popular rexeita propostas socialistas como as de crear un novo Centro de Día e Residencia de Maiores ou a mellora do campo de fútbol.

O PSdeG-PSOE denuncia que o goberno da Xunta de Galicia “esquece a Cariño” nos seus orzamentos para o vindeiro ano 2026, nos que “non se contempla ningún investimento ou a posta en marcha de novos servizos no municipio”.

O voceiro socialista en Cariño, Jonathan Miranda, lembra que o Grupo Parlamentario Socialista realizou no Parlamento galego diversas emendas aos orzamentos para que se contemplasen “investimentos necesarios para este Concello, que ademais son competencia da Xunta”.

“Estamos a falar da posta en marcha do Centro de Día e Residencia de Maiores, investimentos no campo de fútbol ou mellora das naves de antigas conserveiras pertencentes a Portos de Galicia e que están no centro da vila”, enumera o portavoz socialista.

“Tamén solicitamos melloras no transporte público, con máis horarios e mellores conexións, ou a posta en marcha dunha sección da Escola de Idiomas no IES Cabo Ortegal”, engade Miranda.

O socialista afirma que “todas estas propostas son apoiadas por todas as forzas politicas cariñesas, como demostra a aprobación por unanimidade do Pleno de mocións presentadas polo PSdeG, pero no Pleno do Parlamento de Galicia, o PP votou en contra de todas as emendas”.

“Solicitamos ao Partido Popular que nos explique a contradicción de apoiar as iniciativas en Cariño e logo o voto en contra de todas no Parlamento de Galicia”, critica o voceiro socialista local.

Pola súa banda, o parlamentario socialista Aitor Bouza lamenta que “o único que fixo o Partido Popular é aplicar a súa maioría para deixar fóra todas esas reivindicacións do territorio, deixar fóra as reivindicacións de toda a cidadanía galega”.

Bouza critica tamén que o PP de Cariño apoie no pleno municipal as propostas socialistas “de maneira absolutamente electoralista, para intentar captar o apoio da cidadanía de Cariño, xa que cunha man se vota en contra no parlamento e coa outra a favor no territorio”.

“Seguiremos reivindicando ese centro de día, seguiremos reivindicando a residencia de maiores, os investimentos no campo de fútbol e as melloras nas naves das antigas conserveiras, e por iso levarémolo ó debate individualizadamente para que o PP se teña que seguir posicionando”, avanza o deputado.

Conclúe sinalando que dende o PSdeG seguirán “exixindo a Rueda que non esqueza Cariño e que permita que os cidadáns e cidadás de Cariño teñen os mesmos dereitos que o resto dos galegos e das galegas”.

O PSdeG denuncia o uso partidista das redes sociais e da web do Concello de Cariño por parte do equipo de goberno do Partido Popular.

Como xa denunciamos en varias ocasións, o Partido Popular está a utilizar as redes sociais e a páxina web do Concello para uso partidista, apropiándose do que é de todas e todos, e financiado cos cartos de toda a veciñanza.

Tanto as redes sociais como a páxina web municipal deben utilizarse como unha canle de comunicación coa veciñanza, deixando as opinións e comentarios partidistas para as páxinas dos propios partidos.

Comentamos esto pola nova que aparece hoxe na páxina web sobre o inicio das obras no polideportivo, dous anos despois dos seu peche. Na mesma, o equipo de goberno manifesta que nos 8 anos do goberno socialista non se fixeron traballos de reparación no mesmo, mentindo descaradamente.

A maiores dos traballos necesarios para o mantemento, e ademáis da colaboración coa asociación Os Corzos de Ortegal na instalación do rocódromo, o equipo de goberno socialista puxo en marcha un plan de traballo por fases para a remodelación completa da instalación, empezando pola cuberta, e da que xa tiña financiación a través dun convenio coa Deputación da Coruña. En xuño de 2023, só faltaban os permisos para iniciar as obras. Este convenio tamén incluía o cambio da cuberta da Casa da Cultura. O importe total das dúas obras tiña un custo de 239.448,13€.

A pesar de moitas preguntas en Pleno pola nosa parte, o goberno municipal non informaba da situación dos case 200.000€ que a Deputación se comprometeu a achegar para estas dúas obras. Hoxe coñecemos que en febreiro de 2025 (podes ver na imaxe o extracto das resolucións de Presidencia 6702 e 6719 publicado no BOP) a Deputación arquivaba os expedientes ao non ter noticias do Concello, anulando a concesión dos case 200.000€.

Alegrámonos de que despois de dous anos comecen as obras do Polideportivo, pero requerimos ao Goberno Municipal que explique que vai a pasar coa obra da cuberta da Casa de Cultura e instamos a que inicien conversas coa Deputación para recuperar os cartos comprometidos na lexislatura anterior.

Dende o Grupo Municipal Socialista explican que a antigüidade do camión actual “incrementa as avarías, retrasa as recollidas e xera un maior custo de mantemento”.

O PSdeG-PSOE de Cariño presenta ao goberno local unha proposta para que se empreguen os fondos asignados ao Concello pola Deputación da Coruña no POS+2026 para adquirir un novo camión compactador para a recollida de lixo, así como novo material para o Servizo de Axuda no Fogar (SAF).

Dende o Grupo Municipal Socialista sinalan que estas son “dúas necesidades acuciantes no municipio que poden ser solventadas grazas á aportación da institución provincial”.

Por unha banda, sobre o camión compactador, dende o PSdeG apuntan que o Concello do Cariño só ten un disponible e que neste ano “foi habitual que tivese que pasar varios días no taller, provocando que non se recollera o lixo ou a utilización dun camión cedido por concellos limítrofes”.

O texto presentado polo grupo socialista sinala que a antigüidade do vehículo “incrementa as avarías, retrasa as recollidas e xera un maior custo de mantemento”, polo que incide na necesidade de adquirir un novo.

Por outra banda, no texto lémbrase que “o uso de material como camas articuladas ou grúas é fundamental para garantir a seguridade das traballadoras do SAF, así como das persoas usuarias”.

Porén, “moitos domicilios carecen deste tipo de axudas, en moitos casos por carecer dos recursos económicos necesarios para a súa adquisición, coa consecuencia de que as traballadoras realicen as tarefas de forma manual, incrementando o risco de lesións”. “É habitual escoitar á alcaldesa falar do número de baixas que hai no servizo”, lamentan.

Por estas razón, o Grupo Municipal Socialista propón a compra de camas articuladas, grúas ou cadeiras de ducha e a súa posterior cesión ás persoas usuarias, previo informe da necesidade por parte dos Servizos Sociais do Concello.