Transcurridos xa varios días dende as eleccións xerais do pasado 20 de decembro ofrecemos nesta entrada unha breve análise dos resultados prestando especial atención ós do noso Concello.
En Cariño, e como podes ver no gráfico adxunto procedente da web do xornal El País, o Partido Popular foi a forza maioritaria colleitando 878 votos, seguido do PSOE con 609 votos. A coalición En Marea (Podemos, A Nova e EU-IU, entre outras forzas) quedou en terceiro lugar con 571 votos. Ciudadanos foi a cuarta forza (156 votos) e a candidatura nacionalista de Nós (na que se integra o BNG) quedou en quinto lugar con 92. Ningún outro partido superou os 25 votos, aínda que o Partido contra o Maltrato Animal (PACMA) obtivo 20.
É xusto comezar recoñecendo a victoria do Partido Popular tanto a nivel local como autonómico e estatal. No caso de Cariño, confírmase que este partido soe obter os seus peores resultados nas eleccións municipais, mellorando nos comicios autonómicos, estatais ou europeos. En todo caso, o voto de esquerda segue sendo maioritario en Cariño. A suma dos tres partidos situados no espectro ideolóxico do centro-esquerda (PSOE, En Marea e Nós) ascende a 1272 votos, mentres que os dous partidos da dereita (PP e Ciudadanos) suman 1034 votos. Dende a Agrupación Socialista de Cariño queremos expresar o noso agradecemento ás 609 persoas que depositaron a súa confianza no noso partido.
Se analizamos as porcentaxes, como vén sendo habitual o PSOE obtén en Cariño unha das mellores porcentaxes de voto (25’63 %) das comarcas de Ferrolterra-Eume-Ortegal, só superada por A Capela (40’2 %), Monfero (32’71 %), Cerdido (30’43 %) e As Pontes (27’84 %). A porcentaxe de voto socialista en Cariño supera tamén á obtida polo noso partido a nivel estatal, autonómico e provincial. En termos comparativos, esta porcentaxe de voto é lixeiramente inferior á obtida en Cariño nas eleccións xerais de 2011 (28’89 % en 2011 e 25’63 % en 2015), mentres que o PP acusa en Cariño un descenso de case 15 puntos (51’59 % en 2011 e 36’95 % en 2015). Malia este descenso xeralizado da dereita, o PP impúxose na maior parte dos concellos de Ferrolterra, Eume e Ortegal, coa excepción de Narón, As Pontes, Fene e Mugardos (onde gañou En Marea) e A Capela (victoria do PSOE).
En canto ás eleccións ó Senado, temos que lamentar especialmente que o noso compañeiro Ángel Mato non acadase o obxectivo de ser elexido senador pola nosa provincia, a pesar do excelente traballo realizado durante esta campaña electoral, polo cal queremos felicitalo. No noso Concello o candidato ferrolán quedou en cuarto lugar con 551 votos, por detrais dos tres candidatos do PP.
A nivel estatal os resultados debuxan un complexo panorama que vai a requerir pactos e negociacións, que xa deron comezo. O PSOE sufríu dende os meses previos ás eleccións unha dura campaña de acoso mediático e político co obxectivo (máis ficticio que real) de situalo na irrelevancia. A pesar de que moitos medios e enquisas puxeron especial empeño en situalo por detrais de Podemos e Ciudadanos, finalmente o noso partido amosou a súa capacidade de resistencia quedando como segunda forza con 90 escanos. A día de hoxe o PSOE é chave para acadar a gobernabilidade do noso país, situándose entre as opcións posibles a dun goberno de esquerda presidido por Pedro Sánchez. Esta opción, actualmente a debate dentro do partido, non debe ser incompatible cun necesario exercicio de autocrítica co obxectivo de poñer fin á perda de músculo e apoio electoral, con escenarios bastante preocupantes como Madrid ou as tres cidades da nosa provincia. Hai moito traballo por diante.