PSOE Cariño

O pasado xoves, 31 de xullo, celebrouse un novo Pleno Ordinario no Concello de Cariño. Nun dos puntos da Orde do Día formalizouse oficialmente a renuncia do noso compañero José Miguel Alonso Pumar. Dende aquí queremos manifestarlle unha vez máis o noso agradecemento por estes dez anos de intenso traballo, tanto na Alcaldía como na oposición, e desexarlle toda a sorte do mundo nas novas tarefas que vai a desempeñar como xerente do Xeoparque do Cabo Ortegal.

Pasamos a explicar a nosa posición nos asuntos que se trataron, así como os Rogos e Preguntas que realizamos dende o Grupo Municipal Socialista:

Votamos a favor dos días inhábiles para o ano 2026: 16 de xullo e 24 de agosto.

Tal e como manifestamos no seu momento, votamos a favor da proposta que nos trasladou a comunidade educativa para o novo nome do Colexio: CEIP A BASTEIRA. Tamén preguntamos ao equipo de goberno polo seu cambio de parecer sobre este tema: a Alcaldesa no Consello Escolar votou abstención e na Comisión Informativa votaron a favor. Polo que nos explicaron, non o tiñan falado entre eles. Quedou constatado que nin o falaron nin teñen clara a súa posición, xa que no Pleno votaron en contra.

Comezamos o apartado de Rogos e Preguntas amosando o noso rexeitamento á morte de Teresa, traballadora do SAF en O Porriño. Enviamos o noso apoio e solidariedade á familia e compañeiras e apoiamos a concentración convocada para o día seguinte en tódolos concellos.

Quixemos que o equipo de goberno nos aclarara varias cuestións relacionadas co problema da praga de pulgas na Rúa Travesía Centeás:

– Que pasos deu o Goberno Municipal entre o 9 de xuño, no que recibiron a primeira comunicación do problema por parte dunha veciña, e o 23 de xuño, data na que se puxeron en contacto cos donos da vivenda? A Alcaldesa dixo que non foi o 9 senón o 12, pero, polo que entendimos, non fixo nada. Tal e como denunciamos nesta web, ata que a veciñanza denunciou publicamente o problema pasadas dúas semanas, o Concello non actuou.

– Cando se vai a facer a desinfección anunciada para o 9 de xullo, e que a empresa non realizou por falta de sinalización? A Alcaldesa dixo que a empresa entende que non é necesaria, pero ela di que si, e que se vai a facer, pero non aclara cando. Xa estamos en agosto, pasou un mes, e a empresa non volveu pola rúa.

– Non queremos deixar de falar do problema que causou esta praga: a falta de control dos gatos na rúa. A Lei de Benestar animal, en vigor desde setembro de 2023, establece como unha competencia municipal a xestión de colonias felinas, e hai convocatorias públicas de axudas para os concellos para poñelas en marcha. O equipo de goberno non quere asumir a competencia e non solicitou ningunha destas subvencións.

Falamos tamén do Polideportivo Municipal. Poden indicarnos un cronograma de traballo para a licitación, inicio das obras e apertura da instalación? A Alcaldesa contesta que teñen que ter xustificado o convenio para abril de 2026.

Tamén preguntamos sobre o rocódromo e as colchonetas. Vaise a desmontar durante as obras? Que vai a pasar con el? Contestan que non o saben, que xa o dirán os técnicos cando empecen as obras.

Pedimos a creación de video-actas, coa posibilidade de que toda a veciñanza poda ver os Plenos en streaming. Tamén solicitamos que colguen na páxina web as actas (non supón ningún custo económico para o Concello), para que a poboación poda ler os acordos.

Contactaron co colectivo de taxistas do concello para estudar a retirada da cabina telefónica, que está sen uso e en malas condicións, e colocar no seu lugar un panel informativo cos datos de contacto do servizo de taxis? A resposta foi que aínda non.

Algún avance na licitación do proxecto de Renovación de pavimentos na Rúa Río Miño, Río Sor e Sanchola, que quedou deserta en decembro de 2023, hai un ano e sete meses, e cun orzamento de 70.947,09€? A resposta foi que aínda non. O Concello ten agora mesmo proxectos sen licitar por valor de 658.077,16€.

No Pleno anterior falamos da Aula Mentor, e comentaron que iban a solicitar unha axuda para o mantemento da mesma. Cando miramos os Decretos, non vimos a resolución de solicitude. A resposta foi que ao final non se pedíu.

O pasado 14 de maio asistimos a unha charla de Seitura22 sobre as axudas que convoca esta asociación. Solicitouna o Concello? A resposta foi que non.

Algún avance ao respecto das axudas para a renovación da cuberta da Casa da Cultura? O goberno informa que non as concederon e non hai previsión de empezar as obras, aínda que é algo moi necesario.

Temos algunha novidade sobre a axuda para un camión solicitada ao Presidente da Deputación? Polo de agora ningunha.

Sobre a Mostra de Teatro. Poden indicarnos as compañías que gañaron o premio do público en 2024? É que nos sorprende que anuncien que van a entregar un dos premios a Píscore, cando non actuou nesa edición. Parece ser que o premio é para outra compañía pero vanllo dar a eles xa que teñen a mesma distribuidora. Aconsellamos que anuncien ás compañías gañadoras ao remate da Mostra e non ao ano seguinte.

Tamén mostramos a nosa sorpresa ao ver na prensa e nas redes sociais como unha das novidades máis importantes desta edición da Mostra a función da Escola Municipal de Teatro, pero non aparece por ningún sitio nin na web oficial nin no folleto coa programación.

Preguntamos o motivo de que inicialmente (logo o corrixiron) non saíra anunciada a Festa da Caldeirada nas redes sociais do Xeoparque. Polo que nos di a Alcaldesa, é o seu departamento de prensa quen busca os eventos e que moitas veces se olvidan dos de Cariño. A nosa recomendación é que dende o propio Concello lles envíen a programacíón da semana, así evitamos calquera omisión.

Rogamos que utilicen o escudo oficial aprobado pola Xunta de Galicia en 1996. Vimos no cartel da Caldeirada ou en uniformes de persoal municipal un escudo distinto ao aprobado.

Na prensa saíu publicada a convocatoria por parte da Mancomunidade dun curso gratuíto de socorrismo en instalacións e espazos naturais aos que pode apuntarse a veciñanza do Concello. Por qué non se lle deu publicidade en redes sociais e no Cariño Informa?

En abril anunciouse que Cariño sería un dos Concellos que acolla á nova unidade móbil de renovación de DNI, que permite facer todo nun día. Cando vai a vir a Cariño? Vimos anunciado que en setembro aínda eran necesarios dous días, un para facer a solicitude e outro para recollelo. A Alcaldesa dixo que non o sabía.

Cando se van a convocar as axudas para as asociacións neste 2025? Van a permitir investimentos? Contestan que cara a final de ano.

Hai un burato na Laguna bastante grande que debe levar dous meses. Outro máis pequeno no aparcamento do Polideportivo. Cando os van a arreglar? Din que nuns días.

Como foi a reunión con Costas que tiveron o outro día? A Alcaldesa resposta que ben, que falaron do Colexio e do Polideportivo. Que ninguén se preocupou por este tema. Queremos comentar que durante o noso mandato houbo varias reunións a tres bandas (Concello, Xunta e Costas) para tratar o tema de facer un colexio novo na zona na que marca o PXOM, e foi a Xunta de Galicia a que non mostrou interese ningún.

No ano 2024, e durante varios Plenos, comentamos o incremento das aportacións do Estado aos ingresos do Concello. A Alcaldesa dicía que non se podían utilizar eses cartos. A final de ano vimos unha resolución de Alcaldía utilizando esa nova aportación. En 2025 volve a pasar o mesmo, incrementando en 260.982,04€ a cantidade que hai no orzamento. Pode dicirnos a Alcaldesa en que se van a utilizar? Resposta que se van a utilizar en servizos.

Con este texto queremos manifestar a falta de transparencia e o incumprimento da legalidade por parte do Goberno Municipal cariñés ante a problemática dunha praga de pulgas aparecida na Rúa Travesía Centeás.

Logo de ver as queixas veciñais ante este problema e a falta de resposta do Goberno Municipal, presentamos ata tres escritos por rexistro solicitando diversa información; dous deles aínda están sen respostar, incumpríndose amplamente o prazo máximo que teñen para enviarnos a documentación que pedimos.

Denunciamos publicamente esta falta de transparencia xa que parece ser a única forma de que o Goberno Municipal reaccione ante os problemas, tal e como pon de manifesto a inacción que demostraron ata que a veciñanza denunciou en redes sociais e medios de comunicación a existencia desta praga. Os problemas para o Goberno Municipal non existen ata que se fala deles na prensa ou nas redes sociais.

Segundo manifestou a Alcaldesa o 26 de xuño no xornal La Voz de Galicia, “lo primero es avisar a los dueños (lo hicimos el lunes) y se le va a hacer un requerimiento”. Moito tardaron en avisar á propiedade (segundo informa, o fixeron o luns 23 de xuño) cando a primeira comunicación da veciñanza ao Concello foi o 9 de xuño (é dicir, dúas semanas antes).

E seguimos pendentes de que nos informen da nova data de desinfección na rúa logo de que a empresa que veu a realizar a desinfección anunciada para o 9 de xullo non puidera traballar xa que non se sinalizou a zona de traballo como requiren os protocolos (esta información forma parte da documentación solicitada e que aínda non nos enviaron).

Para rematar, queremos recalcar que a orixe principal deste problema, a xestión dos gatos na rúa, é unha competencia municipal segundo a Ley 7/2023, de 28 de marzo, de protección de los derechos y el bienestar de los animales, en vigor dende setembro de 2023 e que afirma o seguinte: “corresponde a las entidades locales la gestión de los gatos comunitarios, a cuyos efectos deberán desarrollar Programas de Gestión de Colonias Felinas”.

Para facilitar a execución desta competencia, o Goberno de España convoca subvencións destinadas ao control poboacional das colonias felinas. Neste 2025 o prazo de solicitude de axudas para executar no ano 2026 rematou o pasado 29 de maio e, polo que temos entendido, dende o Concello non se pedíu ninguna. Aínda está aberto, ata o 12 de setembro, o prazo de solicitude das axudas da Xunta de Galicia.

No día de hoxe, o noso compañeiro José Miguel Alonso Pumar, alcalde de Cariño entre os anos 2015-2023 e voceiro do Grupo Municipal Socialista, presentou a súa renuncia como concelleiro para incorporarse ó posto que acaba de obter, tras superar o correspondente proceso selectivo, de xerente do Xeoparque do Cabo Ortegal. Dende a Agrupación Socialista de Cariño queremos expresarlle o noso máis fondo agradecemento polo seu traballo ó longo destes dez anos no Concello, desexándolle o mellor nesta nova etapa. En breve informaremos sobre a renovación do Grupo Municipal.

Reproducimos aquí o comunicado que o noso compañeiro vén de publicar en redes sociais:

Como moitos saberedes, actualmente formo parte da corporación municipal do Concello de Cariño como concelleiro electo nos comicios municipais celebrados en maio do 2023, actuando en representación do grupo municipal socialista PSdeG-PSOE, do que son o voceiro para o período 2023-2027.

Como non pode ser doutro xeito, ata o día de hoxe sempre tratei de atender fielmente e de forma completa o mandato cidadán que me foi encomendado. É dicir, con maior ou menor sorte teño por costume acabar todo aquilo que comezo.

Con todo, e de maneira absolutamente excepcional, nesta ocasión non poderá ser así. O motivo é que recentemente veño de acadar mediante oposición unha praza laboral como xerente do Xeoparque do Cabo Ortegal, un fascinante proxecto comarcal que ten que axudar a xerar sinerxias positivas e proxección internacional do territorio. O novo encargo non resulta legalmente incompatible coa miña actual tarefa como edil do noso concello, pero persoalmente entendo que o é non só de xeito práctico senón tamén -e por riba de todo- ético.

Na forma en que entendo a situación, o xerente dun ámbito tan concreto e integrador como o é o Xeoparque do Cabo Ortegal ten que estar fóra da disputa política diaria. Esta idea veño compartíndoa dende fai tempo non só cos meus familiares cercanos, ou cos compañeiros e compañeiras do partido en Cariño, senón que mesmo hai meses fixen partícipe da mesma á actual alcaldesa, Ana López (a quen, por certo, agradezo a súa discreción respecto diso).

Así as cousas, e mediante este texto, quero informarvos de que hoxe notifiquei a miña renuncia á acta de concelleiro, logo de 10 marabillosos anos traballando institucionalmente para tratar de facer de Cariño un lugar un pouquiño mellor no que vivir.

Sen dúbida unhas veces con acertos e outras cometendo erros. Pero é díficil expresar con palabras a percepción que sinto ó ter sido un privilexiado por gozar desa posibilidade xa que en realidade non pode haber maior honra para un cariñés.

Agora tomará o relevo como concelleiro do PSdeG-PSOE un novo compañeiro, Carlos Pernas, ó que lle desexo a maior das sortes. Estou convencido de que fará un gran labor na procura dun Cariño que ten que mudar a mellor. Ogallá sexa axiña, confío en que así será.

E na parte que me toca, e xa sexa dende o Xeoparque ou a título persoal, sempre estarei ó dispor de quen o precise para botar unha man en calquera iniciativa que poida ser positiva para Cariño e comarca.

O dito, moitas grazas, un abrazo grande a todas e todos… e viva Cariño!!

O 28 de xuño conmemoramos o Día Internacional do Orgullo LGTBI. Facémolo lembrando a rebelión no bar Stonewall en 1969, semente do movemento que hoxe continúa defendendo dereitos, dignidade e igualdade. Pero este 2025 é, ademais, unha data sinalada: cúmprense 20 anos da aprobación do matrimonio igualitario e da adopción homoparental en España, un fito que transformou o noso país nun referente mundial en liberdade e igualdade.

Baixo o lema estatal deste ano, “20 anos avanzando en dereitos: nin un paso atrás”, a mobilización do Orgullo 2025 convértese nun berro colectivo fronte o recorte de dereitos tanto a nivel nacional como internacional. O Orgullo será, máis ca nunca, unha chamada á acción para blindar o futuro e defender o que tanto custou conquistar.

Queremos lembrar con gratitude e orgullo a figura de Pedro Zerolo, incansable activista e compañeiro socialista, cuxo compromiso e valentía foron determinantes para facer realidade esta conquista histórica. Grazas ao seu traballo e ao do Goberno socialista de José Luis Rodríguez Zapatero, España converteuse en pioneira na defensa dos dereitos das persoas LGTBI. Este ano cúmprense tamén 10 anos do seu pasamento e rendémoslle homenaxe mantendo viva a súa loita e o seu legado: unha sociedade máis xusta, diversa e libre.

Pero as raíces da nosa loita tamén están na nosa terra. En Galicia celebramos a historia de Marcela e Elisa, que no ano 1901 protagonizaron o primeiro matrimonio entre dúas mulleres do que se ten constancia no noso país, desafiando as normas da súa época e reivindicando con valentía o dereito a ser e amar en liberdade. E mesmo moito antes, no ano 1061, Pedro Díaz e Muño Vandilaz, veciños de Rairiz de Veiga (Ourense), foron unidos por un sacerdote no que se considera unha das primeiras evidencias históricas dunha unión entre dous homes en Europa. Galicia, con historia propia, foi e segue a ser terra de diversidade.

Con todo, na actualidade temos motivos para a preocupación. O avance da ultradereita e a súa entrada en distintos gobernos está a abrir a porta a discursos de odio que provocan un alarmante aumento dos delitos de LGTBIfobia. A censura, a invisibilización e a negación de dereitos son unha ameaza directa á convivencia democrática. Non o imos permitir. Como socialistas, alzamos a voz con firmeza: fronte ao odio, máis igualdade. Fronte á intolerancia, máis educación. Fronte ao retroceso, máis orgullo.

PSdeG-PSOE reafirma o seu compromiso coa defensa da liberdade e a diversidade nas cidades, pero tamén no ámbito rural, onde aínda existen moitos silencios e medos que romper. Apostamos por unha Galicia onde as persoas LGTBI poidan vivir con dignidade e visibilidade e por unha educación inclusiva que forme en igualdade dende a infancia.

Seguiremos impulsando políticas públicas valentes que garantan a igualdade real das persoas LGTBI, asegurando tanto o marco legal como a súa aplicación efectiva. Defenderemos os dereitos conquistados fronte a calquera intento de retroceso e traballaremos para ampliar as proteccións e garantir vidas libres de discriminación, violencia e odio. Porque os dereitos non se negocian: deféndense e fanse valer con vontade política.

O Orgullo é memoria, presente e futuro. É celebración, mais tamén loita. É dereito a vivir sen medo e en liberdade.

Animamos á cidadanía galega a sumarse ás mobilizacións e actividades do Orgullo en todas as comarcas e cidades de Galicia.

Porque Galicia é diversa. Galicia é orgullosa. Viva o Orgullo LGTBI!

Tralos congresos federal, nacional e provincial, a Agrupación Socialista de Cariño pechou o presente ciclo congresual este pasado sábado, 31 de maio, coa celebración da Asamblea Extraordinaria para a renovación da súa Comisión Executiva, na que Jonathan Miranda resultou elexido Secretario Xeral.

Jonathan é Técnico Superior en Administración e Finanzas e concelleiro socialista na corporación municipal dende o ano 2015, estando a cargo das áreas de Facenda, Cultura, Deportes, Educación e Xuventude nos dous últimos gobernos encabezados polo noso partido (2015-19 e 2019-23). É militante do PSdeG-PSOE dende hai máis de 15 anos, tendo desempeñado diversas responsabilidades na Agrupación Socialista de Cariño, entre elas a de Secretario de Organización e Administración entre marzo de 2022 e maio de 2025. Está acompañado por María José Fraguela na Vicesecretaría Xeral e Secretaría de Política Municipal, Benestar Social, Servizos Públicos e Igualdade; e por Alberto Iglesias na Secretaría de Organización, Acción Electoral e Administración. As restantes secretarías de área da nova Comisión Executiva Local serán desempeñadas por Carlos Pernas (Cultura e Deporte e Adxunto á Secretaría de Organización), Ana Fachal (Desenvolvemento Local e Emprego), Lois Armada (Formación e Memoria Democrática), José Miguel Alonso (Medio Natural), José Pérez (Novas Tecnoloxías e Comunicación) e Carmen del Río (Xuventude). Como representante no Comité Provincial resultou elexida María José Fraguela.

Jonathan Miranda substitúe na Secretaría Xeral a José Miguel Alonso, que ocupou o posto durante máis de 11 anos dende que fora elexido en febreiro de 2014. Dende a Agrupación queremos agradecerlle o traballo realizado en todos estes anos, nos que gañamos dúas eleccións municipais (2015 e 2019, estas últimas con maioría absoluta) e nos que o socialismo cariñés estivo representado nas Executivas Provincial e Nacional. A súa presenza na nova Executiva Local garantiza que poderemos seguir contando coa súa implicación.

A Agrupación Socialista de Cariño afronta con ilusión e compromiso esta nova etapa, na que pretende centrarse en tres obxectivos principais. En primeiro lugar, seguir sendo un instrumento de participación política e formación en torno ós ideais do socialismo democrático. En segundo lugar, gañar as vindeiras eleccións municipais e recuperar a Alcaldía cun proxecto renovado e ambicioso que supere a actual situación de parálise municipal. En terceiro lugar, pero non menos importante, contribuír ó proxecto socialista en Galicia e no conxunto do estado mediante a participación activa en procesos orgánicos, campañas electorais ou foros de debate.

O pasado xoves, 29 de maio, tivemos Pleno Ordinario. O equipo de goberno non incluíu na Orde do Día ningún asunto para debater, polo que pasamos a explicar os Rogos e Preguntas que realizamos dende o Grupo Municipal Socialista.

Comezamos explicando a ausencia por motivos persoais do noso Portavoz, José Miguel Alonso, no Pleno anterior.

Como levamos facendo dende hai bastantes Plenos, pedimos a creación de vídeo-actas, coa posibilidade de que toda a veciñanza poda ver os Plenos en streaming. Tamén solicitamos que colguen na páxina web as actas (non supón ningún custo económico para o Concello), para que a poboación poda ler os acordos.

Preguntamos pola situación de Marcultura, en Sismundi. Recordámoslle á Alcaldesa que a concesión de dominio público á empresa xa debe estar vencida, polo que debe falar con Costas para coñecer a situación actual do expediente e, en todo caso, debe ser a propia empresa a que recolla todo o material que alí se atopa.

Recordamos a petición do pintado da parada de taxis. Tamén pedimos que contacten co colectivo de taxistas do Concello para estudar a retirada da cabina telefónica, que está sen uso e en malas condicións, e coloquen no seu lugar un panel informativo cos datos de contacto do servizo de taxis.

Pedimos á Alcaldesa que se reúna coa Sociedade de Xestión de Activos procedentes da Reestructuración Bancaria (SAREB), xa que é titular de varios edificios sen habitar no noso Concello. Sería interesante que os puxeran en aluguer, xa que así evitaríamos o seu deterioro e ampliaríamos a escasa oferta de vivenda.

Rogamos que se poña en marcha o Plan Especial do Casco Vello. En dito espazo dispoñemos de moitas vivendas baleiras e moitas en mal estado, que, logo de aprobar o Plan e solicitar un Área de Rehabilitación Integral, permitirían ampliar a oferta de vivenda e crear novos empregos cos traballos de rehabilitación. En xuño de 2023, estaba todo listo para a aprobación inicial.

Tamén pedimos que se retomen os traballos do Plan Xeral de Ordenación Municipal (PXOM), paralizados dende xuño de 2023. No novo PXOM estaba prevista a declaración de San Xiao e a Vacariza como núcleo rural, o que obrigaría ás empresas eléctricas a asumir o coste económico de levar o subministro eléctrico ás vivendas (no seu momento estaba valorado en máis de 120.000€).

En decembro de 2023, a licitación do proxecto de Renovación de pavimentos na Rúa Río Miño, Río Sor e Sanchola quedou deserta. Dende aquela, non volveu a saír a licitación. Según comentan, está o enxeñeiro actualizando os prezos para volver a licitar a obra.

Preguntamos se hai algunha novidade na situación da praza do médico do Centro de Saúde. A Alcaldesa responde que non hai médicos, e que prefiren quedar nas cidades antes que vir a Cariño. Pedimos que reclame á Xunta de Galicia que “faga atractiva” a praza incrementando o complemento específico para que sexa cuberta en propiedade, evitando que exista unha sanidade de primeira e outra de segunda en función da localidade donde residamos.

En Plenos anteriores o equipo de goberno dixo que xa estaba todo listo para poñer en marcha a Aula Mentor. Preguntamos se xa teñen unha data e din que para setembro.

A Alcaldesa informa, despois da nosa pregunta, que xa tivo unha reunión co Presidente da Deputación. Comenta que non falaron das subvencións que o goberno socialista tiña acordadas (cubertas do Polideportivo e Auditorio, por uns 200.000€) e pediron axuda para a compra dun camión para implantar un novo proxecto de reciclaxe.

Pedimos información sobre a situación do Polideportivo. Informan que aínda non teñen data para as obras. Para a cuberta do Auditorio dinnos que pediron dúas axudas. Preguntamos se son compatibles entre si, e se vai a ser posible cumplir cos requisitos das dúas á hora de executar e xustificar en caso de que as concedan. Contestan “que xa se verá, que hai que probar”.

Logo de varias reunións da Mesa de Negociación para tratar a Relación de Postos de Traballo (RPT), rogamos que fagan unha actualización completa da proposta, xa que están a traballar co proxecto de 2019.

Vimos o Decreto polo que sacan a licitación o subministro eléctrico, e preguntamos o motivo de que non o fagan a través da Central de Contratación da FEMP, á que nos adherimos en outubro de 2020. Entendemos que o prezo para unha maioría de Concellos de España vai a ser máis baixo que a oferta que realicen as empresas só para o noso Concello.

Preguntamos se contactaron coa Dirección Xeral de Medio Ambiente para tratar o tema do xabarín en Cariño. A resposta foi clara: non.

O pasado 14 de abril, a Deputación da Coruña publicou no BOP unhas bases para a contratación de Arquitectos e Arquitectos Técnicos por parte dos concellos. Informan que o Concello non solicitou a adhesión e que o van a estudar.

O Celta de Vigo enviou a todos os concellos de Galicia unha camiseta e unha bandeira para pedir o apoio no último partido. A Concelleira de Deportes di que nuns días sacarán unha foto coa directiva do CD Cariño, agora que xa rematou a tempada.

Pedimos información sobre unhas cartas que lles chegaron a varios propietarios das Vivendas de Uso Turístico (VUT). A Alcaldesa comenta que o asunto xa está solucionado.

Rogamos que dende Servizos Sociais se poña en marcha unha listaxe de veciños e veciñas electrodependentes (utilizan máquinas conectadas á corriente eléctrica como respiradores, etc.), para que en momentos de apagón ou avaría eléctrica, dende o Concello se poñan en contacto con eles e axudalos no que necesiten.

En 2023, o actual equipo de goberno renunciou a unha axuda para a instalación de desfibriladores automáticos no Polideportivo e na Piscina. Preguntamos se van a retomar a proposta, xa que a vemos moi necesaria. Contestan que se sae unha axuda para esto a van a pedir.

No mes de febreiro solicitamos, xunto ao BNG, unha reunión da Xunta de Portavoces para tratar o cambio de nome das rúas, aprobado no Pleno, así como a proposta do Grupo Municipal Socialista de creación do Consello Municipal da Memoria Democrática. A Alcaldesa di que nalgún momento nos vai a convocar. Tamén preguntamos o motivo polo que non se incluíu na orde do día deste Pleno a proposta de cambio de nome do Colexio, aprobada polo Claustro e polo Consello Escolar. Din que non lles deu tempo.

Preguntamos polo expediente de reversión dos terreos de Portos a Costas para a posterior cesión ao Concello. Parécenos un “imposto revolucionario” que Portos lle cobre ao Concello pola utilización de terreos que xa non teñen uso portuario e que estamos a manter (Praza Roxa, terreos onde se ubican a Casa do Concello e o Mercado, etc). Segundo noticias publicadas na propia páxina web de Portos, xa mantiveron reunións con moitos concellos para aprobar a reversión (Cangas, Vilanova de Arousa, Foz, A Guarda, A Pobra do Caramiñal, Ponteceso, Cambados, Bueu, Oleiros, A Illa de Arousa, Vilagarcía de Arousa, Laxe, Rianxo, Poio, O Grove, Mugardos e Moaña), pero Cariño non está entre eles. A Alcaldesa informa que mantén contacto con Portos, pero que aínda non saben nada.

Vimos a resolución das axudas do GALP A Mariña – Ortegal de data 21 de maio. Cariño solicitou unha axuda de case 50.000€, pero non a concederon xa que Intervención realizou un informe no que dí que o investimento solicitado non era competencia muncipal.

O día 13 de maio, a Alcaldesa asinou a Resolución de Alcaldía coa liquidación de 2024. Entre os datos máis importantes (véxanse as gráficas que acompañan a esta entrada), están os seguintes:

– Fondos líquidos a 31/12/2024: 1.204.170,76€ (+376.946,37€ respecto ao 31/12/2023).

– Remanente: 1.078.593,95€ (+548.331,24€ sobre o remanente de 2023).

– Resultado presupostario: 348.818,46€

– Estabilidade: 487.208,51€

Rogamos ao equipo de goberno que deixen de dicir que o Concello non ten cartos, e que utilicen parte do remanente en investimentos moi necesarios para Cariño.

Rematamos con outro rogo ao equipo de goberno: “rogamos que se dediquen a cazar subvencións (algunhas xa se lles escaparon) en lugar de levar a cabo unha caza de bruxas entre a veciñanza que non opina como vostedes”.