Entramos hai escasos días no mes de setembro despois dun intenso agosto repleto de actividade. Facemos un balance moi positivo dos diferentes eventos celebrados neste verán (Festa da Caldeirada e da Sardiña Lañada, Mostra de Teatro, actividades deportivas, festas patronais…), que son, en boa medida, resultado do intenso traballo desenvolvido polo Goberno Municipal. É obrigado recoñecer tamén o papel dos colectivos, asociacións e comisións de festas das diferentes parroquias do Concello, que achegaron unha colaboración indispensable e organizaron os seus propios eventos e actividades. Un luxo contar con este tecido social e asociativo.
Foi un verán dun bo tempo inusual e cun repunte notable do turismo, o que supón un importante incentivo para a economía local. Debemos seguir traballando para que o turismo sostible e de calidade sexa un vector importante na economía cariñesa.
O novo curso político preséntase intenso. Por un lado, prevemos que sexa un ano no que se materialicen proxectos relevantes nos que está traballando o Goberno Municipal cariñés.
A nivel supramunicipal, temos eleccións autonómicas o vindeiro 25 de setembro. Non vai a ser sinxelo, pero se a esquerda consegue movilizarse e facer unha boa campaña é posible poñer fin á moi negativa etapa de Núñez Feijóo e acadar un goberno de progreso en Galicia. Dende a Agrupación Socialista de Cariño achegaremos o noso gran de area para que así sexa.
A estas alturas, e despois de varios meses, a formación de goberno en España segue sen resolverse. É máis que comprensible o descontento e a frustración da cidadanía. Dende aquí solicitamos altura de miras e capacidade de diálogo a tódalas forzas políticas.
O noso partido abordará nos vindeiros meses un ciclo congresual ordinario que, como é habitual, afectará á estrutura completa da organización (federal, autonómica, provincial e local). É unha excelente oportunidade para o debate ideolóxico, a actualización programática e a renovación de equipos. A cidadanía deste país necesita un socialismo forte e debemos estar á altura. Informaremos puntualmente.