Outro exemplo grave de discriminación do PP hacia Cariño son os recentes Plan de Ordenación do Litoral (POL) e Directrices de Ordenación do Territorio (DOT). En ambos actúase contra os intereses do noso Concello de xeito intolerable nun estado de dereito, falseando a nosa realidade territorial e a de toda a península do Ortegal (entendendo como tal dende Mera ata Cariño).
A modo de exemplo, podemos citar a excesiva protección que se establece no río do Sagrón –onde vai ubicado o polígono industrial– no cal protexen co nivel 4 o que eles denominan “corredor ecolóxico”, nunha franxa duns
O noso Concello sae sempre perxudicado en ambos documentos, anulándose por exemplo a importancia do noso porto, que non figura citado, como tamén sucede coa propia cabeceira do termo municipal. Nas Directrices de Ordenación do Territorio (DOT) o noso Concello, e a península do Ortegal en xeral, quedan privados de instrumentos de desenvolvemento, mentres que Ortigueira defínese como Nodo de equilibrio territorial, no que se pretenden concentrar infraestructuras e servizos para fixar poboación.
Por seguir cos exemplos, mentres Ribadeo e Viveiro califícanse como cabeceira do sistema urbano intermedio, e Foz e Burela como subcabeceiras, co que elo supón de beneficio á hora de poder desenvolverse no novo marco legal que van supoñer estes documentos, Cariño queda reducido á nada e, na práctica, supeditado ó nodo de equilibrio territorial que é Ortigueira.
É imposible manipular máis a realidade cariñesa. Evidentemente, e como non podía ser doutro xeito, presentamos alegacións tanto ó POL como ás DOT, cuxo contido foi na maior parte rexeitado pola Xunta do PP. Neste momento, temos xa presentados en tempo e forma recursos contencioso-administrativos ante o Tribunal Superior de Xustiza de Galicia para poder defendernos deste infame atropelo.
O PP cariñés, como cabía agardar, non presentou alegacións a este despropósito e, ademais, abstivéronse cando levamos a Pleno as presentadas polo Grupo de Goberno que conformamos @s cinco concelleir@s do PSdeG-PSOE e os dous do BNG. Evidentemente, tampouco presentaron ningún recurso en tempo e forma, polo que deducimos que ó PP cariñés parécelle ben esta afrenta que a Xunta do seu partido lle fai a Cariño.
As consecuencias poden ser graves. Para que te fagas unha idea do alcance que estes textos legais teñen para a nosa cidadanía, as vivendas e os solares existentes a día de hoxe no Plan Xeral de Ordenación Municipal (PXOM) que quedan afectados por esta arbitraria protección do litoral só poderán facer reparacións de mantenemento, pero nunca aumentar o volume edificatorio, co conseguinte perxuízo económico para @s propietari@s das casas e solares afectados. Estamos a falar do maior atentado contra os intereses económicos da cidadanía cariñesa perpetrado en moito tempo.
Nos actos de campaña vimos referíndonos á situación na que pretende deixarnos o PP con este novo marco legal para a ordenación do territorio. Queda claro que as cousas non cambiaron con respecto á súa anterior etapa na Xunta e no Concello: o obxectivo segue a ser centralizar servizos en Ortigueira e favorecer o desenvolvemento do Concello veciño perxudicando gravemente a Cariño. Só un goberno municipal forte que defenda con firmeza os intereses de Cariño pode evitar que este agravio saia adiante.
Por esta razón, se a cidadanía cariñesa renova a confianza no noso proxecto, unha das primeiras medidas que levaremos a cabo, ademais de continuar co contencioso xa presentado ante o Tribunal Superior de Xustiza de Galicia, será reunir ás forzas políticas que formen parte da corporación para establecer un plan de traballo encamiñado a frear este auténtico despropósito.