A edición en papel de La Voz de Galicia publica hoxe unha noticia sobre Galicia Mar Renovables, a empresa que está a construir na zona portuaria as instalacións para a ensamblaxe de sistemas de xeneración de enerxía undimotriz.
Os responsables da empresa afirman estar á espera de que o Concello lles conceda a licencia definitiva de actividade, condición indispensable para comezar a funcionar. Por parte do Concello, a Alcaldesa xustifica a tardanza na concesión desta licencia na necesidade de subsanar algunhas cuestións técnicas do proxecto e na escasez de persoal municipal. Pola nosa parte, instamos ó Concello a que axilice todo o posible esta tramitación. A excusa permanente non serve; os asuntos hai que solucionalos.
A planta estase a construir co apoio do Programa de Axudas para Actuacións de Reindustrialización impulsado polo Ministerio de Industria para rexenerar o tecido empresarial en zonas desfavorecidas.
Na noticia publicada na prensa a empresa non precisa cal será o seu plantel inicial, pero facilita un enderezo de correo electrónico para que as persoas interesadas envíen o seu currículo: info@gmrenovables.com, e remite tamén á súa páxina web para coñecer calquera novidade ó respecto: www.gmrenovables.com
Dende aquí queremos desexarlle á empresa sorte no seu proxecto e abogar por unha próxima entrada en funcionamento das instalacións de Cariño, co desexo de que proporcionen novas alternativas laborais no noso Concello.
Aproveitamos tamén para desexarche que desfrutes destes carnavais.