Coas eleccións europeas de maio como telón de fondo, o PSdeG-PSOE celebra este sábado 12 de abril en Pontevedra, no hotel Galicia Palace, unha xornada de traballo que leva por título A nova Política Pesqueira Común a debate.
A presentación da xornada, a partir das 10 da mañá, correrá a cargo de Agustín Fernández González, Secretario Xeral da Agrupación Municipal de Pontevedra, e de Carme Casalderrey Piñeiro, Secretaria de Economía Pesqueira da Comisión Executiva Nacional Galega do PSdeG. A continuación intervirá a Secretaria de Organización do PSdeG, Pilar Cancela Rodríguez.
A parte principal do evento desenvolverase a partir das 10:30 da mañá e consistirá nun coloquio a tres bandas coas intervencións de Xosé Ramón Val Alonso, voceiro de Pesca do PSdeG no Parlamento de Galicia, que falará sobre Europa e a súa incidencia na pesca galega; do expresidente da Xunta e catedrático de Economía Aplicada na UDC Fernando González Laxe, que desenvolverá Unha análise crítica da Política Pesqueira Común; e do Responsable de Pesca Nacional e Internacional en España da UGT Manoel Souto González, ocupándose de Os dereitos sociais dentro da Política Pesqueira Común.
A partir das 12:30 horas o exministro e candidato europeo José Blanco exporá as conclusións da xornada, que será clausurada media hora despois por José Ramón Gómez Besteiro, Secretario Xeral do PSdeG.