Nun contexto como o actual, no que algúns atrévense incluso a predecir aberracións como a desaparición do libro impreso, resulta reconfortante constatar que aínda existen apostas firmes polo libro e pola cultura.
É o caso do xornal Público, que hoxe sábado lanza a súa cuarta colección consecutiva. Primeiro foron as obras de Vázquez Montalbán; logo a colección Pensamiento Crítico, que contribuíu á difusión de autores fundamentais como M. Sacristán, E. Hobsbawm ou V. Navarro; e a continuación a súa colección de Premios Nobel da Literatura. A nova colección leva por título Voces Críticas e pretende rescatar a autores e autoras españois perseguidos, exiliados, represaliados ou asasinados polo franquismo, como Federico García Lorca, Rafael Alberti ou María Zambrano. Como afirma o propio xornal na publicidade na súa nova colección, "un homenaje a la pluralidad de ideas, la memoria histórica y la cultura". Os libros desta colección distribúense co xornal dos sábados, ó prezo conxunto de dous euros.